Qoʻshimcha funksionallar
-
Tungi ko‘rinish
«Mo‘ynoq» sanoat zonasida tadbirkorlik sub'yektlari 10 yil muddatga barcha turdagi soliqlardan ozod etiladi
O‘zbekistonda yana bir sanoat zonasi - «Mo‘ynoq» kichik sanoat zonasi barpo etiladi. Prezident bu sanoat zonasida tadbirkorlarga alohida, respublikada o‘xshashi bo‘lmagan, imtiyoz va preferensiyalar taqdim etgan.
28 fevral kuni prezident «Qoraqalpog‘iston Respublikasi Mo‘ynoq tumanini 2017-2018 yillarda iqtisodiy rivojlantirish va bandlikni ta'minlashga doir qo‘shimcha chora-tadbirlar to‘g‘risida»gi qarorini qabul qildi.
Qarorga ko‘ra, Mo‘ynoq tumanidagi sobiq «Mo‘ynoq baliq konserva kombinati» hududida 16 gektar va sobiq 5-qurilish boshqarmasi hududida 4,5 gektar, jami 20,5 gektar maydonda elektrotexnika, qurilish materiallari, sug‘orish uskunalari, suv nasoslari, suv hisoblagichlari, suv quvurlari, tayyor trikotaj, tikuvchilik va boshqa zamonaviy mahsulotlarni ishlab chiqarishni tashkil etish bo‘yicha «Mo‘ynoq» kichik sanoat zonasi barpo etiladi.
Prezident «Mo‘ynoq» kichik sanoat zonasida tadbirkorlik sub'yektlariga soliqlar bo‘yicha ulkan imtiyozlar taqdim etishga ko‘rsatma bergan.
Jumladan, sanoat zonasi hududida yangi tashkil etiladigan va uning maydonida sanoat sohasida faoliyat yuritadigan tadbirkorlik sub'yektlari 10 yil muddatga (2017 yilning 1 aprelidan 2027 yilning 1 yanvariga qadar) barcha turdagi soliqlardan ozod etiladi:
«Mo‘ynoq» kichik sanoat zonasida qayta yaratilgan va tadbirkorlik faoliyatini olib borayotgan sanoat sohasidagi korxonalar soliqlarning barcha turidan;
Mo‘ynoq tumani hududida ro‘yxatdan o‘tgan va o‘z faoliyatini olib borayotgan yakka tadbirkorlar qat'iy belgilangan soliqdan;
Tuman hududida ro‘yxatdan o‘tgan va o‘z faoliyatini olib borayotgan yuridik shaxslarning ta'sischilariga to‘lanadigan dividend ko‘rinishidagi daromadlarga solinadigan soliqlardan ozod etiladi.
Bundan tashqari, tadbirkorlar Mo‘ynoq tumanida joylashgan va foydalanilmayotgan bo‘sh davlat obektlarini o‘n yilgacha muddatga yangi ish o‘rinlari yaratish sharti bilan ijara haqining «nol» stavkasi bo‘yicha ijaraga olishi mumkin.
Dasturda alohida urg‘u sayyohlik salohiyatini yaratishga berilgan. Shuningdek, hujjat Mo‘ynoq shahrini obodonlashtirish bo‘yicha katta ko‘lamdagi ishlarni olib borishni ko‘zda tutadi.
