Ramzon Qodirov hijob kiyishga taqiqni jamiyat uchun falokatli deb atadi

Checheniston rahbari Ramzon Qodirov jamoat joylarida musulmonlarning an'anaviy liboslarini kiyib yurishni taqiqlash haqida taklifni tanqid qildi. Bu haqda TASS “Rossiya 1” telekanali efiriga asoslanib xabar bermoqda.

“Bunday taqiq Rossiya jamiyati uchun falokatlidir, sababi biz Rossiya fuqarolarimiz, [bu] ko‘pmillatli va ko‘pdinli mamlakat”, - dedi Qodirov.

Checheniston rahbarining aytishicha, Rossiyada yashovchi musulmonlar uning teng huquqli fuqarolari sanaladi. “Biz o‘z davlatimizni madaniyat va dinlardagi urf-odatlarga rioya qilgan holda mustahkamlashimiz kerak, shunda hech kim bizni mag‘lub eta olmaydi”, - deya ta'kidlab o‘tdi u.

31 yanvar kuni Butunrossiya jamoatchilik fikrini o‘rganish tadqiqot markazi so‘rov natijalarini e'lon qildi. Unga ko‘ra, maktablarda hijob kiyib yurishga taqiqni ko‘pchilik rossiyaliklar qo‘llab-quvvatlashgan.

24 yanvar kuni esa Rossiya ilm-fan va ta'lim vaziri Olga Vasileva Mordoviyaning Belozere qishlog‘idagi vaziyatga izoh bera turib ( u yerda o‘qituvchi va o‘quvchilardan ro‘mol o‘rab yurishdan voz kechishni talab qilishdi), Rossiyadagi ta'limning dunyoviy ekanini eslatdi. Shundan so‘ng Tatariston muftiysi Komil Samigullin Vasileva musulmonlarning tarixiy qadriyatlariga qarshi borayotganini ma'lum qildi.

2015 yilning fevralida Rossiya oliy sudi Mordoviya maktablarida hijoblar va boshqa diniy kiyimlar, bundan tashqari, kalta yubkalar, jinsilar, ochiq-sochiq kiyimlarni kiyib yurishga qo‘yilgan taqiqni qonuniy, deb tan oldi. Avvaliga taqiq ushbu respublika hukumati tomonidan qo‘yilgandi.