15:43 / 13.03.2017
4270

Mingdan ziyod salatni tayyorlay oluvchi Sally robotlari AQSh restoranlariga "ishga joylandi"

Chowbotics kompaniyasining Sally nomli roboti deyarli birovning yordamisiz mingdan ziyod salatlarni tayyorlay oladi. Shu xususiyati sabab investorlar unga 5 million dollar sarmoya kiritishga rozi bo‘lishgan. Hi-News shu haqida xabar berdi. 

Oshxonangizda bunday yordamchi bo‘lishi haqida orzu qilishga biroz erta, chunki Sally hozirgi holatida odatiy kvartiralarga sig‘maydi. Shunday bo‘lsa-da, bunday dastyor qurilma umumiy ovqatlanish muassasalari uchun ayni muddaodir. Tez orada u restoranlar, kafelar, mehmonxonalar yoki shifoxona oshxonalarida turli-tuman salatlarni tayyorlab berishi mumkin. 

Chowbotics rahbari Dipaka Sekara robotlarning shu bahor mavsumining o‘zidayoq sotila boshlashiga ishonchi komil. Shuningdek u biroz vaqt o‘tgach, bunday qurilmalar uylarda ham paydo bo‘lishini taxmin qilmoqda. Personal kompyuterlarda ham xuddi shunday holat kuzatilgandi - dastlab katta mashinalar paydo bo‘lgan, keyinchalik ularning hajmi kichrayib, keng qo‘llana boshlangan. 

Sally robotlari hozircha faqat Kaliforniya va San-Frantsiskodagi bir necha restoranlarga "ishga joylandi". Ular bir necha haftadan so‘ng "malaka oshira" boshlaydi.

Top