Ostonada firibgar olti yildan beri bir xil bahona bilan kishilarni “chuv” tushirib kelmoqda

Qozog‘iston poytaxti Ostona shahri ko‘chalarida bir necha yildan beri soddadil fuqarolar hisobiga yashaydigan firibgar borligi ma'lum bo‘ldi. U uyga qaytish uchun chipta haqidagi soxta hikoya to‘qib, ko‘z yoshi to‘kib pul so‘raydi, deb xabar qilmoqda NUR.KZ.

Bu haqda ostonalik Yelena Sherbina Facebook’da aytib o‘tgan – u yordam so‘ragan erkakka bir marta rahmi kelib yordam bergan, bir necha oydan so‘ng u yana xuddi o‘sha iltimos bilan uchratgan.

«Ko‘chada kishilardan aldov yo‘li bilan pul so‘raydigan firibgar haqida aytib bermoqchiman. U o‘zini Alibek deb tanishtirib, quruvchi ekanini aytadi. Ishga kelganini gapiradi. Do‘stinikida qolmoqchi bo‘lib kelganini, biroq u safarga ketgani, hamda endilikda uyga chipta sotib olish uchun puli yo‘qligini aytadi.

Shaxsini tasdiqlovchi hujjatni, bir tomonga bo‘lgan chiptani ko‘rsatadi. U 3 ming tengesi borligi, ammo chipta sotib olish uchun yana 4 ming yetishmayotganini aytib, qo‘shib berishlarini so‘raydi. Juda ham achinarli tarzda, bolalari borligini aytib, gapiradi. Men unga ishondim», - deya yozgan qiz.

Ilk bora “omadsiz quruvchi” unga joriy yilning yanvar oyida O‘rinbor ko‘chasida uchragan. Yelena erkakka yonidagi hamma pullarini berib yuborgan.

«Bugun esa, Turon kesishmasidagi Qo‘nayev ko‘chasida uni yana o‘sha eski “hikoyasi” bilan uchratdim. Men boshqa kiyimda hamda boshqa bola bilan edim, shuning uchun u meni tanimadi. Unga pul berganim va u aldayotgani haqida aytganimda, qochib ketdi.

Suratga olishga ulgurmadim. Bo‘yi taxminan 165 sm, ozg‘in, mo‘ylovi bor, ko‘zlari olazarak. Agarda sizga ham uchrasa – unga ishonmang», - deya qo‘shimcha qilib o‘tgan ostonalik qiz.

Ma'lum bo‘lishicha, u firibgarning yagona “qurboni” emas. Aniqlanishicha, Alibek bir necha yildan beri bu shaharda «uyga chipta xarid qilish» uchun pul so‘rash bilan shug‘ullanib kelar ekan.

«Ikki yil avval Yesil hokimiyati yonida ham menga uchragan, o‘tgan yili esa Doira maydonida yonimga keldi – hikoyasi hamon o‘sha-o‘sha. Firibgar», - deya yozgan Aliya Nauanova ismli foydalanuvchi.

Ostonalik Mariya Klimenkoning ma'lum qilishicha, "bu firibgar olti yildan beri hech keta olmaydi" hamda poytaxtda uni ko‘pchilik yaxshi biladi.

«Mening yonimga ham kelib juda achinarli tarzda hikoyasini aytib bergan. Unga 2 ming tenge berdim. Bir necha oydan so‘ng esa yana uchradi va ko‘z yoshi to‘kib yana pul so‘radi, men unga barchasini aytib berganimda esa, qochib ketdi», - deya qo‘shimcha qilib o‘tgan Madina Shikayeva.

«Rosti, unga ishondim. Dekabrning o‘rtalarida uchratdim va 2 ming tenge berdim. Uch kundan so‘ng esa boshqa qizga shunday yolg‘on bilan gapirayotganini ko‘rib qoldim. Yoniga borib, o‘zimga qaratganimda, o‘zini yo‘qotib qo‘ydi. Bu Sig‘anak-Turkiston kesishmasida ro‘y berdi, aftidan, “so‘rash” joyini o‘zgartirgan", - deya yozadi Maral Aujanova.