Jizzaxda diniy vaziyatni yanada sog‘lomlashtirishga doir targ‘ibot tadbirlari o‘tkazilmoqda

Jizzax viloyatining Zarbdor tumanida Vazirlar Mahkamasining “2017 yilda diniy vaziyatni yanada sog‘lomlashtirish, konfessiyalar va millatlararo totuvlikni mustahkamlashga doir chora-tadbirlar dasturi” ijrosiga bag‘ishlangan targ‘ibot tadbiri tashkil etildi.  

Tadbirda hududda ijtimoiy-ma'naviy muhitni sog‘lomlashtirishning dolzarb masalalari va  bir qator muammoli vaziyatlar muhokama qilindi.

Jizzax viloyat xokimligi jamoat va diniy tashkilotlari bilan aloqalar kotibiyati tomonidan o‘tkazilgan mazkur uchrashuvda viloyat  hokimligi,  xotin  qizlar qo‘mitasi vakillari, voyaga yetmaganlar bilan  ishlash  komissiya a'zolari, mahalla  faollari,  deputatlar, o‘qituvchilar,  davlat va jamoat tashkilotlari vakillari qatnashdilar.

Yoshlar  o‘rtasida huquqbuzarlik holatlarining sodir etilishida asosan yigit-qizlarning nazoratsiz qolishi, oila, mahalla, ta'lim muassasalari o‘rtasidagi hamkorlikning to‘g‘ri yo‘lga qo‘yilmaganligi katta kamchiliklardan biri sanaladi. Buning natijasida nazoratsiz yoshlar turli xil illatlar domiga tushib qolmoqdalar.

Diniy ekstremistik oqimlar ta'siriga tushib qolgan yoshlarni oilalari bilan o‘tkazilgan uchrashuvda ularni bu yo‘ldan qaytarish maqsadida tushunchalar berildi.

Shuningdek, uchrashuv tashkil etilgan joyda diniy ekstremistik oqimlarning illatlari aks etgan fotoko‘rgazma  o‘tkazilib, tumandagi kollej bitiruvchilariga homiylarning tikuv mashinlari taqdim etildi.