Bu haqda «Dunyo» axborot agentligi World Nuclear News portaliga tayanib xabar berdi.
«Rosatom» maʼlumotlariga köra, VVER-1000 reaktorlariga ega ikkita yirik energoblok kiçik modulli reaktorlar yonida joylaştiriladi. Hozir maydonda muhandislik-qidiruv işlari olib borilmoqda va loyiha takomillaştirilmoqda.
Kiçik reaktorlar qurilişi davom etmoqda
Xabarda qayd etilişiça, bölajak AES maydonida ikkita kiçik modulli reaktor qurilişi amalga oşirilmoqda. 2026-yil may oyida poydevorning birinçi beton plitasi quyilgan. U bilan boğliq işlarni yil oxirigaça yakunlaş rejalaştirilgan.
Şu bilan birga, tayyorlaş uzoq vaqt talab etadigan uskunalar işlab çiqarilmoqda. Kiçik energobloklardan biri uçun reaktor korpusi allaqaçon tayyor bölgan. Birinçi kiçik blokning ekspluatatsiya xodimlarini işga qabul qilişni 2027-yil oxirida boşlaş möljallangan.
«Rosatom» rahbari Aleksey Lixaçyovning taʼkidlaşiça, mazkur loyiha hozir eksport modeli böyiça amalga oşirilayotgan dunyodagi yagona kiçik atom elektr stansiyasi hisoblanadi.
Qurilişga mahalliy kompaniyalar jalb qilinadi
Ayni paytda quriliş maydonida ming nafardan ortiq kişi mehnat qilmoqda. Yaqin oylarda xodimlar sonini kamida ikki barobarga oşiriş rejalaştirilgan. Umumiy quriliş işlarining katta qismini Özbekiston kompaniyalariga topşiriş közda tutilmoqda.
Stansiya yaqinida barpo etilişi rejalaştirilgan «yadro şaharçasi»ning birinçi bosqiçi 33 ming aholiga möljallanadi. Unda energiya tejamkor uy-joylar, taʼlim, tibbiyot va sport obyektlari qurilişi nazarda tutilgan.
Portal maʼlumotiga köra, prezident Şavkat Mirziyoyevning «Rosatom» rahbari bilan uçraşuvida atom energetikasi uçun malakali kadrlar tayyorlaş hamda uy-joy qurilişi sohasidagi hamkorlik masalalari ham muhokama qilingan.
