«Dunyo» axborot agentligi Britaniyaning Heritage Daily naşriga tayanib xabar berişiça, qidiruv işlari sentabr oyida Madaniy meros agentligi va Samarqand arxeologiya instituti mutaxassislari tomonidan olib borilgan.
Tadqiqotlar Jizzax viloyatining Zomin va Şarof Raşidov tumanlarini qamrab olgan. Natijada Zomin vohasi hamda Turkiston toğ tizmasi yonbağirlarida qadimgi insonlar yaşagan bir neçta manzilgoh topilgan.
Xususan, Zomin tumanidagi Aççi qişloğining şarqiy qismida paleolit - qadimgi toş davriga oid manzilgoh aniqlangan. Peşagor qişloği yaqinida esa neolit - yangi toş davri manzilgohi topilgan.
Aççining ğarbiy qismi va Arja qişloği atrofidan ham neolit davriga tegişli artefaktlar aniqlangan.
Turli davrlarga oid manzilgohlarning bir hududda uçraşi Zomin vohasi va uning toğli hududlari qadimgi odamlar uçun yaşaş hamda tabiiy resurslardan foydalanişga qulay bölganini körsatadi. Topilmalar ularning harakatlaniş yönalişlari va xöjalik faoliyatini örganişga yordam berişi mumkin.
Şarof Raşidov tumanidagi Ravot qişloği yaqinida esa ilgari qayd etilmagan petrogliflar - qoyatoş tasvirlari majmuasi topilgan. Ular Ravotsoy daryosining çap sohilidagi slanets qoyalarga işlangan.
Hozirga qadar yettita qoya yuzasida 30 ga yaqin tasvir hujjatlaştirilgan. Kamondan öq uzayotgan ovçi surati bilan birga, qoyalardan birida quyoş ramziga öxşaş belgi ham aniqlangan.
Mutaxassislarning dastlabki bahosiga köra, qoyatoş tasvirlari turli davrlarda - ehtimol, bronza davridan ilk örta asrlargaça yaratilgan. Demak, ularni topilgan toş davri manzilgohlari bilan bir davrga mansub deb hisoblaşga hozirça asos yöq. Tasvirlarning aniq yoşini belgilaş uçun qöşimça tadqiqotlar zarur.
Olimlar kelgusida yangi obyektlarni kengroq örganib, ularning yoşi, madaniy ahamiyati va Markaziy Osiyodagi boşqa qadimiy yodgorliklar bilan aloqasini aniqlaşni rejalaştirmoqda.
