Bolgariyadagi parlament saylovlarining dastlabki norasmiy natijalari paydo bo‘ldi

Bolgariyada muddatdan avvalgi parlament saylovlarida 32,8 foiz ovoz bilan sobiq bosh vazir Boyko Borisov boshchiligidagi "Fuqarolar Bolgariyaning yevropacha rivojlanishi uchun" partiyasi yetakchilik qilmoqda. Bundan Gallup International tadqiqot agentligining ekzit-poll ma'lumotlari darak bermoqda.

2-o‘rinni Bolgariya sotsialistik partiyasi 28,4 foiz bilan egallamoqda.

Bundan tashqari, parlamentga kirish uchun 4 foizlik chegarani "Birlashgan vatanparvarlar" (8,8 foiz), "Huquq va erkinliklar uchun harakat" (7,8) va "Iroda" partiyasi (4,6) o‘tdi. 

Birinchi rasmiy ma'lumotlar butun dunyo bo‘ylab saylov uchastkalari yopilgach, 27 martga o‘tar kechasi paydo bo‘ladi.

Dastlabki ma'lumotlarga ko‘ra, "Fuqarolar Bolgariyaning yevropacha rivojlanishi uchun" partiyasiga 86 tadan 92 tagacha o‘rin, Bolgariya sotsialistik partiyasiga 75 tadan 81 tagacha o‘rin tegishi mumkin.