2015 yilning 10 aprelida Andijon viloyati Baliqchi tumani IIB profilaktika inspektori, leytenant Sh.Mirzayevga “Olimbek” qishloq fuqarolar yig‘inida yashovchi er-xotin murojaat etdi, deb yozadi “Postda” gazetasi.
Inspektor ularni kabinetiga taklif qilib, nima gapligini so‘radi. Ular shoshib-pishib ikki bosh buzog‘ini o‘g‘irlab ketishganini aytishdi. So‘ng A.Ismoilov biroz o‘zini bosib olib, yuz bergan voqeani shunday bayon etdi:
- Bizning ikki bosh govmishimiz bor. To‘qqizinchi aprel kuni kechki payt ishdan qaytganimdan so‘ng odatga ko‘ra sigiru buzoqlarning oxuriga pichan soldim. So‘ng uyga kirib, bola-chaqa bilan ovqatlandim. Kechasi soat o‘n ikkilarga yaqin uxlagani yotdik. Ertalab soat oltilarda xotinim sigir sog‘ish uchun borsa, buzoqlar yo‘q. Turmush o‘rtog‘im uyga kirib, og‘ilxonaning eshigi ochiqligini, buzoqlar esa yo‘qligini aytdi. Avvaliga buzoqlar o‘tlagani o‘tloqqa ketgan bo‘lsa kerak deb o‘yladim. Chunki ilgari ham shunday bo‘lib turardi. Ularni izlagani tashqariga chiqdim. Yo‘l-yo‘lakay qo‘ni-qo‘shnilardane ikki bosh buzoqqa ko‘zingiz tushmadimi deb so‘rab bordim. Ular yelka qisib, hech qanday buzoqqa ko‘zi tushmaganini aytishdi. O‘tloqda ham jonivorlarni topmagach, shoshilib izimga qaytdim. Xotinimga buzoqlarni topolmaganimni aytdim. Kechasi uxlab yotganimizda kimdir og‘ilxonaga kirib, buzoqlarni o‘g‘irlab ketibdi.
- Demak, sizningcha, mollaringizni o‘g‘irlab ketishganmi? – so‘radi jabrdiydadan inspektor. – Xo‘sh, gumoningiz kimdan?
A.Ismoilov bir daqiqa sukut saqlab, kimdan gumon qilishni bilmasligini aytdi.
- Ha, mayli, tekshirib ko‘ramiz. Sizlar uyingizga boraveringlar. Men qo‘ni-qo‘shnilaringizdan so‘rab-surishtiraman. Balki, kimdir nimanidir ko‘rgandir yoki eshitgandir, - deb inspektor er-xotinni xotirjam qilib kuzatib qo‘ydi.
Qonunga ko‘ra, ichki ishlar organi xodimi o‘g‘irlik haqidagi arizani qabul qilib olishi kerak edi. Ammo inspektor o‘zining xizmat vazifalariga rioya etmadi, jinoyat yuz berganligi haqidagi arizani qabul qilib olmadi. U o‘z manfaatini ko‘zlab ish tutdi, xizmat hududida kriminogen vaziyat ko‘rsatkichlarini yomonlashtirishni istamadi. Buning ustiga shoshilinch tergov-surishtiruv harakatlarini o‘tkazmadi, yuz bergan voqea haqida tuman IIB navbatchilik qismiga xabar bermadi, ariza va xabarlar kitobiga xabarni qayd etmadi.
Oradan muayyan vaqt o‘tib, A.Ismoilov profilaktika inspektoridan: “O‘g‘ri topildimi, buzoqlardan darak bormi?” deb so‘radi. Ammo o‘zining savoliga tayinli javob ololmadi. “Qing‘ir ishning qiyig‘i qirq yildan keyin ham chiqadi” deb bejiz aytishmaydi. Prokuratura organlari tomonidan 2016 yilning avgustida jinoyatni hisobga olishda qasddan yashirish holati bo‘yicha jinoyat ishi qo‘zg‘atildi.
Sud jinoyat ishi materiallarini sinchiklab o‘rgandi, jabrdiydaning, guvohlarning va sudlanuvchining ko‘rsatmalarini tinglab, Sh.Mirzayevni jinoyat sodir etishda aybdor deb topdi. Joriy yilning 11 yanvar kuni jinoyat ishlari bo‘yicha Baliqchi tuman sudi Andijon viloyati Baliqchi tumani IIB profilaktika inspektori, leytenant Sherzodbek Mirzayevni ish haqining 20 foizini davlat hisobiga chegirib qolgan holda ikki yil muddatga axloq tuzatish ishlariga hukm qildi. Shuningdek, unga ikki yil davomida moddiy javobgarlik lavozimlarini egallashni taqiqladi.
Sudlanuvchi o‘z aybiga to‘la iqrorligi, qilmishidan pushaymonligi, muqaddam sudlanmaganligi hisobga olinib, unga nisbatan amnistiya akti qo‘llanildi va asosiy jazodan ozod etildi.
“Postda” gazetasining xabar berishicha, o‘tgan yil davomida O‘zbekiston JKning 241\1-moddasida ko‘zda tutilgan (“Jinoyatni hisobga olishdan qasddan yashirish”) jinoyatni sodir etgani uchun ichki ishlar organlarining bir necha xodim sud organlari tomonidan javobgarlikka tortilgan.
