Toshkentda MDH TIVK yig‘ilishi. Ko‘rib chiqiladigan asosiy masalalar

Bugun Toshkentda MDH Tashqi ishlar vazirlari kengashining majlisi boshlanadi. Majlis kun tartibiga 16 hujjat loyihasi kiritilgan. Ular Hamdo‘stlik mamlakatlarining siyosiy, savdo-iqtisodiy, huquqiy, madaniy-gumanitar va boshqa sohalardagi hamkorligini rivojlantirish, mintaqaviy xavfsizlikni mustahkamlash, jinoyatchilikka qarshi kurashish masalalariga qaratilgan.

O‘zbekiston TIV xabariga ko‘ra, MDH davlatlari delegatsiyalari Toshkentga yetib kelishdi.

Mustaqil Davlatlar Hamdo‘stligi ishtirokchi davlatlari TIV kengashining navbatdagi yig‘ilishida ishtirok etish uchun Belarus TIV rahbari Vladimir Makey, Qozog‘iston TIV rahbari Kayrat Abdraxmanov, Qirg‘iziston TIV rahbari Erlan Abdildayev, Rossiya Federatsiyasi TIV rahbari Sergey Lavrov, Tojikiston TIV rahbari Sirodjidin Aslov, Ozarbayjon TIV rahbari o‘rinbosari Xalaf Xalafov, Moldova Respublikasi tashqi ishlar va Yevropa bilan integratsiya vaziri o‘rinbosari Lilian Dariy, Turkmaniston TIV rahbari o‘rinbosari Vepa Xadjiyev va MDH Ijroiya qo‘mitasi raisi – Ijrochi kotibi Sergey Lebedev boshchiligidagi delegatsiyalar yetib kelgan.

Yig‘ilish davomida tashqi ishlar vazirliklari rahbarlari xalqaro va mintaqaviy muammolar yuzasidan fikr almashadilar, Hamdo‘stlik doirasida hamkorlikni rivojlantirish masalalarini muhokama qiladilar, hamda huquq-tartibot, madaniy va harbiy sohalarda hamkorlikni mustahkamlashga qaratilgan hujjatlarni tasdiqlaydilar.

Yig‘ilishda ishtirokchi davlatlarning mintaqaviy xavfsizlik va barqarorlikni mustahkamlash, savdo-iqtisodiy va madaniy-gumanitar hamkorlikni chuqurlashtirish, shuningdek barqaror rivojlanishni ta'minlashda ko‘p tomonlama hamkorligiga oid 15ta masala muhokama qilinishi rejalashtirilmoqda.

Jumladan, Toshkentda terrorizmga qarshi kurashga qaratilgan qator hujjatlar tasdiqlanishi kutilmoqda.