Davlat rahbari raislik toʻgʻrisidagi qaror qoʻllab-quvvatlangani va umumiy ishga hissa qoʻshish, yangi gʻoyalarni taklif etish va bugungi kunda Hamdoʻstlik mamlakatlari uchun chindan ham muhim boʻlgan yoʻnalishlarni birgalikda rivojlantirish imkoniyati uchun barcha hamkasblariga minnatdorlik bildirdi.
– Biz kelgusi yili aniq va sezilarli natija beradigan masalalarni eʼtibor markaziga qoʻyish niyatidamiz. Bular – iqtisodiyot, yangi texnologiyalar, transport, xavfsizlik, taʼlim, ilm-fan va inson salohiyatini rivojlantirishdir, – dedi Mirziyoyev.
Ushbu yondashuv Oʻzbekistonning raisligi uchun belgilangan «MDH – ishonch va umumiy taraqqiyot makoni» degan shiorda oʻz ifodasini topdi.
Ayni paytda Raislik konsepsiyasi va tadbirlar rejasini ishlab chiqish ishlari yakunlanmoqda. Ularda yuzdan ortiq aniq tadbirni amalga oshirish koʻzda tutilgan.
Oʻzbekiston raisligi davridagi ustuvor yoʻnalishlar va amaliy hamkorlik mexanizmlari taqdim etildi.
Hamdoʻstlik doirasidagi siyosiy muloqotga alohida eʼtibor qaratiladi.
– Bugun, dunyoda vaziyat tobora murakkablashib borayotgan bir paytda har qanday masalani xotirjam muhokama qilish, bir-birimizni tinglash hamda barchamizga maqbul boʻlgan yechimlarni izlash imkoniyatini saqlab qolish oʻta muhimdir, – dedi davlat rahbari.
MDH mamlakatlari salmoqli ishlab chiqarish salohiyati, resurslar, texnologiyalar va bozorlarga ega ekanini inobatga olib, iqtisodiyot sohasida asosiy eʼtiborni sanoat kooperatsiyasiga qaratish taklif etildi.
– Agar bu salohiyatimizni birlashtirsak, qoʻshma ishlab chiqarish quvvatlarini yaratsak va barqaror yetkazib berish zanjirlarini yoʻlga qoʻysak, barcha ishtirokchilar uchun natija yanada sezilarli boʻladi, – dedi Mirziyoyev.
Bu borada mamlakatlar oʻrtasidagi savdo-sotiqqa xalaqit berib kelayotgan toʻsiqlarni bartaraf etish muhim ahamiyat kasb etadi.
Raqamli texnologiyalar bilan bogʻliq yoʻnalishga ham alohida eʼtibor qaratildi. Bunda faqat hozirning oʻzida ham yaxshi rivojlangan sohalar bilan cheklanib qolmaslik muhimligi taʼkidlandi.
– Oldinga qadam tashlash va yaqin yillarda mamlakatlarimiz iqtisodiyoti raqobatbardoshligini oshirish bilan bogʻliq boʻladigan sohalarda birgalikda ishlash zarur. Bu oʻrinda soʻz muhim minerallar, sunʼiy intellekt, robotlashtirish, yangi materiallar va zamonaviy energetika texnologiyalari sohalari haqida bormoqda. Aynan shu sohalar bugungi kunda oʻz kompetensiyalarimiz hamda qoʻshma loyihalarni yaratgan holda, ortda qolib ketmasligimiz muhim boʻlgan yoʻnalishlardir, – dedi Mirziyoyev.
