2027-yil 1-yanvardan Mustaqil Davlatlar Hamdoʻstligiga (MDH) raislik Oʻzbekistonga oʻtadi. Bu haqda 9-oktabr kuni MDH davlat rahbarlari kengashi majlisi yakunlari boʻyicha qaror qabul qilindi.
Oʻzbekiston bilan birgalikda Turkmaniston va ilk bor Ozarboyjon ham hamraislik qiladi.
Navbatdagi MDH sammiti 2027-yil 8−9-oktabr kunlari Buxoroda boʻlib oʻtadi. Bu Oʻzbekistonning ikkinchi raisligi boʻladi: mamlakat ilk bor 2020-yilda Hamdoʻstlikka raislik qilgan edi.
MDH (Mustaqil Davlatlar Hamdoʻstligi) 1991-yil dekabr oyida, SSSR parchalanganidan soʻng tashkil etilgan. Tashkilotga ilgari Sovet Ittifoqi tarkibiga kirgan davlatlar aʼzo hisoblanadi. Hamkorlikning asosini savdo, transport, xavfsizlik, gumanitar va madaniy aloqalar tashkil etadi. Oliy organi - Davlat rahbarlari kengashi boʻlib, qarorgohi Minsk shahrida joylashgan.
MDHga raislik har yili rotatsiya asosida almashib turadi. Raislik qiluvchi mamlakat yilning ustuvor yoʻnalishlarini belgilaydi, Hamdoʻstlik tadbirlarini tashkil etadi va davlat rahbarlari sammitiga mezbonlik qiladi.
