Futbol muxlisi O‘zbekiston terma jamoasi ko‘rsatayotgan o‘yinlar bo‘yicha mulohazalarini bildirdi.
Tribuna.uz’ning “Instagram” sahifasida milliy terma jamoamiz sardori Odil Ahmedovning jurnalist savollariga bergan javobini o‘qib, hayron qoldim. Maqola ostiga o‘z fikrlarimni qoldirdim, ne ajabki, ma'lum vaqtdan so‘ng men qoldirgan sharhlar o‘chirib tashlanibdi. Hayron qoldim va o‘sha yerda qoldirgan muxtasar fikrlarimni kengaytirib, yana sizlar bilan o‘rtoqlashishga qaror qildim.
E'tiborimni birinchi bo‘lib tortgan narsa Odil Ahmedov Suriya bilan bo‘lgan o‘yinda toshloq maydonda o‘ynashgani va havoni noqulay ekanligini “bahona” qilgani.
Yuqorida aytib o‘tilgan suhbatda bildirilgan fikrlar, kimsan Odil Ahmedovga umuman yarashmaganligini nafaqat men, balki ko‘p sonli muxlislar e'tirof etishdi. MTJ sardoriga hurmatimni izhor qilgan holda o‘z qarashlarim bilan o‘rtoqlashsam.
Kezi kelganda aytib o‘tish joiz, men va men kabi juda ko‘pchilik muxlislar farzandlarimiz Ahmedov kabi mashhur, omadli, qobiliyatli, mehnatsevar va vatanparvar (Suriya bilan bo‘lgan o‘yin va jurnalist bilan bo‘lgan suhbat bundan mustasno) bo‘lishini orzu qilamiz. Odil Ahmedov darajasiga yetish yuzlab, minglab va millionlab yoshlar va ota-onalarning orzusi.
Zotan, shunday mavqega ega bo‘lgan jamoa sardori o‘ziga yarashadigan gaplarni gapirsa obro‘siga obro‘, hurmatiga hurmat qo‘shiladi.
Biz muxlislar ham juda yaxshi tushunamizki, har qanday kuchli jamoa ham ma'lum o‘yinlarda mag‘lubiyatga uchrab turadi, bunga tarixdan misollar ko‘p, uzoqqa bormasdan “Barselona” klubining Yevropa chempionlar ligasidagi kutilmagan natijalari-yu, Braziliyani jahon chempionatidagi ahvolini keltirish yetarli. Yoki Angliya Primer-ligasida chempion jamoa o‘z maydonida autsayder jamoaga mag‘lubiyatga uchrab turishi o‘ta oddiy hol.
Binobarin, O‘zbekiston milliy terma jamoasi Braziliya ham, “Barselona” ham emas. Bu bizning terma jamoa va har qanday holatda ham biz MTJni sevamiz va qo‘llab-quvatlaymiz, shaxsiy fikrlarimga savol bera olish imkoniyatidaman.
Demak boshladik: stadion
Odil Ahmedovning aytishicha, stadion toshloq va notekis bo‘lgan. Ana o‘sha alamli va kutilmagan mag‘lubiyatni bevosita stadiondan kuzatish baxtiga muyassar bo‘lgan kam sonli muxlislardan biri sifatida va Malayziyada 7 yildan beri yashashimni hisobga olib, aniq ayta olamanki, sardorimizning bu javoblari o‘zlariga umuman yarashmapti.
