Oliy va o‘rta maxsus ta'lim vazirligi xodimlari urush faxriysi xonadonida bo‘lishdi

Umumxalq bayrami bo‘lmish 9 may – Xotira va qadrlash kuni munosabati bilan talabalar tomonidan Ikkinchi jahon urushi qatnashchilari va mehnat faxriylarining uylariga borib, ularning holidan xabar olish ezgu an'anaga aylangan. Bu yil ham ana shu an'ana davom ettirilmoqda. 

Bugun Oliy va o‘rta maxsus ta'lim vazirligining bir guruh xodimlari tabarruk 95 yoshni qarshilagan Ikkinchi jahon urushi qatnashchisi, harbiy uchuvchi, iqtisod fanlari doktori, professor, xizmat ko‘rsatgan fan arbobi Muxtor Rasulov va u kishining turmush o‘rtoqlari Sanobar Rasulovalar xonadonida mehmon bo‘ldilar. Bu haqda Oliy va o‘rta maxsus ta'lim vazirligi Ma'naviy-axloqiy tarbiya boshqarmasi Kun.uz’ga xabar bermoqda.

Vazirlik xodimlari Muxtor Rasulovning Ikkinchi jahon urushidagi qahramonliklari, Vatan himoyasidagi tengsiz jasorati uchun minnatdorchilik bildirdilar. Bundan tashqari, olimning oliy ta'lim tizimiga qo‘shgan ulkan hissasi va ko‘p yillik mehnatini alohida e'tirof etdilar.

Ikkinchi jahon urushidan avvalgi ocharchilik yillaridan boshlangan suhbat bugungi dorulomon kunlarga bog‘lanib ketdi. Ustoz Muxtor Rasulov yosh avlodni mustaqillik va bunday omon-omon kunlarning qadriga yetishga o‘rgatish lozimligini qayta-qayta ta'kidladilar. Bu ishga hozir ham, bundan keyin ham o‘zining munosib hissasini qo‘shishga tayyor ekanini uqtirdilar.

- Sanobarxon bilan ilk marta pedagogika bilim yurtida o‘qib yurgan kezlarimda uchrashganman. O‘shanda dadam Toshkentga kelib, menga yordam berib turadigan odam borligini aytgan. Meni yetaklab o‘sha odamnikiga olib borgan. Sanobar o‘sha odamning qizi ekan. O‘sha paytdayoq yuragim jiz etgan edi, – deydi Muxtor Rasulov 72 yildan beri birgalikda umrguzaronlik qilib kelayotgan 90 yoshli turmush o‘rtoqlari haqida.
Mehmonlarning “Bizga ham 95 yoshga kirishning yo‘llarini aytib bering”, degan so‘roviga“Albatta, eng avvalo, istaymizmi, yo‘qmi, uzoq yashashning siri bu – mehnat! Mening soham bo‘yicha aytishadiki, ijod. To‘xtovsiz ijod qilish. Men 95 yillik umrimning qariyb 50 yilini oliy ta'lim tizimida o‘tkazganman.

Keyin to‘g‘ri turmush, to‘g‘ri yashay bilish, me'yorida muomala qilish, me'yor bilan ishlash. Har bir narsaga ochiqko‘ngillilik  bilan yondashish. Yana eng muhim narsa – qayg‘urmaslik”, deya javob qaytardi ustoz.

- Mustaqillik Sizning hayotingizga qanday o‘zgarishlar olib keldi?– degan savolga ko‘kragiga 27 ta shoda-shoda medal taqqan Muxtor Rasulov shunday javob berdi:

- Mustaqillik men uchun tom ma'nodagi katta baxt! Bugungacha bo‘lgan 95 yillik umrimning mustaqillikkacha bo‘lgan davri bilan mustaqillikka erishilgandan keyingi davrini tarozi pallasiga qo‘ysak, keyingi 26 yil bosib ketishi aniq. Chunki, mana, 92 yoshga kirdim. Oxirgi 22 yil davomida 70 yoshimgacha ko‘rmagan yaxshi kunlarni ko‘rdim. Asosiysi, dilimda armon qolmadi.

Prezidentimiz va hukumatimiz bizga nafaqat 9 may arafasida, balki yil davomida juda katta e'tibor bilan qarayotganidan cheksiz minnatdormiz. Iloyo, biz ko‘rgan yomon kunlarni farzandlarimiz aslo ko‘rmasin”.

Yana bir yangilik. Kuni kecha Muxtor Rasulovga O‘zbekiston Respublikasining Prezidenti Shavkat Mirziyoyevning shaxsiy tabriknomasi yetkazildi. Ustoz bundan baxtli va quvonchli kun bo‘lmaganini aytib, Prezidentimiz haqiga uzoq va davomli duo qildilar.

Vazirlik apparati xodimlari tomonidan joriy yilning 12 may kuniga qadar mana shunday tashriflar davom ettirladi.