Amerikaning iste'molchilar ittifoqi Consumer Reports haydovchilar xarid qilganlaridan so‘ng afsus qilgan avtomobillarning «aksilreyting»ini e'lon qildi. So‘rovda 2014-2017 yillarda ishlab chiqarilgan avtomobillarni xarid qilgan 300 ming kishi ishtirok etgan. Quyidagi 7 modelni haydovchilar yana bir bor imkon berilganida hech qachon xarid qilmagan bo‘lishlarini bildirishgan.
Jeep Compass
Compass «ixcham yo‘ltanlamas»lar orasida aksilreyting yetakchisi deb topildi. Avtomobil noqulay o‘rindiqlar, orqani ko‘rishning yomonligi, yomon dinamika va shovqinlikning balandligi sabab shunday natijani qayd etmoqda. So‘ralganlarning atigi 42 foizi yo‘ltanlamasga ishonch bildirgan.
Nissan Pathfinder
O‘rta hajmli avtomobillar qatoridagi «oltin» mukofot Yaponiya avtomobilsozlik sanoati vakili Pathfinder mashinasiga tegishli bo‘ldi. Uni xarid qilganlarning aksariyati avtomobil xarid qilishga arzimaydi, degan fikrni bildirgan. Pathfinder modeliga xos murakkab yo‘llarda harakatlanish sifati, ishonchsizligi va yoqilg‘ini ko‘p sarflashi shundog‘am yomon avtomobilga nisbatan qarashni yanada pasaytirgan.
Dodge Dart
Ixcham sedanlar orasida yana bir «amerikalik» mashina haydovchilarning ishonchini oqlay olmagan. Xaridorlarga ko‘ra, sovutgichi talabga javob bermaydi, noqulay o‘rindiqlar, sekin tezlik oladi va ko‘plab texnik muammolari bor. Albatta, ta'kidlash joiz, u allaqachon ishlab chiqarishdan olingan.
Chrysler 200
200 lik Chrysler ham «Dart» kabi ishlab chiqarishdan olingan. Ta'kidlanishicha, ushbu ikki model uchun "Fiat" kompaniyasining Alfa Romeo Guilietta platformasi olingan. Uning egalari tor salondan, uskunalarning o‘rtacha sifatli ekanidan, 4 silindrli motorning kuchsizligidan va o‘ta shovqinidan nolishgan.
