Oʻzbekiston milliy jamoasi bosh murabbiyi Fabio Kannavaro dunyodagi eng yuqori maosh oluvchi murabbiylar qatorida koʻrsatildi.
Transfermarkt portali reytingda italiyalik mutaxassisning Oʻzbekistondagi yillik maoshi 4 million yevro deb qayd etilgan. Bu koʻrsatkich bilan Kannavaro roʻyxatda 5-oʻrindan joy olgan.
Undan yuqorida Braziliya milliy jamoasi bosh murabbiyi Karlo Anchelotti - 10 mln yevro, Germaniya ustozi Yurgen Klopp - 7 mln yevro, AQSH bosh murabbiyi Maurisio Pochettino - 6,1 mln yevro va Angliya ustozi Tomas Tuxel - 6 mln yevro bilan koʻrsatilgan.
Shuningdek, Portugaliya milliy jamoasi bosh murabbiyi Jorje Jezush ham Kannavaro bilan bir xil - 4 mln yevro maosh olishi qayd etilgan.
Reytingdan Oʻzbekiston bosh murabbiyining maoshi Fransiya ustozi Zinedin Zidan (3,6 mln yevro), Niderlandiya bosh murabbiyi Xavi (2,5 mln), Argentina ustozi Lionel Skaloni (2,3 mln), Turkiya bosh murabbiyi Vinchenso Montella (2,2 mln) va Italiya ustozi Roberto Manchini (2 mln yevro) maoshidan yuqori ekani maʼlum boʻlmoqda.
Biroq bu yerda muhim jihat bor: Kannavaroning milliy jamoadagi maoshi Oʻzbekiston futbol assotsiatsiyasi tomonidan hech qachon rasman eʼlon qilinmagan. Aksincha, OʻFA vitse-prezidenti Ravshan Ermatov 2025-yil oktabrida Kannavaro va uning shtabi yiliga 4 mln yevro olishi haqidagi xabarlarni rad etgan va aniq summa murabbiy bilan kelishuvga koʻra oshkor qilinmasligini aytgan.
Qolaversa, Kannavaroning oʻzi ham keyinchalik «Mening yillik maoshim 4 mln yevro emas», deb bu raqamni ochiq rad etgan.
Transfermarkt - 2000-yilda Germaniyada tashkil etilgan yirik futbol axborot portali. Unda futbolchilar, murabbiylar va klublar haqida maʼlumotlar, transferlar, statistika, oʻyinlar natijalari hamda futbolchilarning taxminiy bozor qiymatlari jamlanadi. Portalning bozor qiymati kabi ayrim koʻrsatkichlari rasmiy narx emas, balki umumiy baholash asosida shakllantiriladi.
