«Real»ning ikki futbolchisi Italiyada paydo bo‘ladi

«Inter» «Real»ning ikki futbolchisi, yarim himoyachi Xames Rodriges va himoyachi Pepeni o‘z safiga qo‘shib olishga yaqin. Bu haqda Sportitalia xabar tarqatdi.

Manba ma'lumotiga ko‘ra, tomonlar faol tarzda muzokara o‘tkazishmoqda va neradzurrilar jamoasi katta transferlar amalga oshirish arafasida.

Pepening «Real» bilan shartnomasi shu yilning yoziga qadar edi va u milanliklar jamoasi safiga erkin agent sifatida yo‘l olishi mumkin. 

Xamesning «qaymoqranglilar» bilan kelishuvi muddati 2020 yilgacha, ammo futbolchi jamoadagi raqobat tufayli boshqa jamoaga ketmoqchi. «Real» bu kolumbiyalik futbolchini 2014 yilda 75 mln yevroga xarid qilgandi.

Avvalroq Jorjye Mendeshning mijozi bo‘lgan bu futbolchi «Manchester Yunayted»ga o‘tishi haqida xabarlar tarqalgandi.

Primeraning yakunlangan mavsumida Rodriges 22 uchrashuvda maydonga tushib, 8 gol urdi va 6 golga uzatma berdi. Pepe esa 13 o‘yinda 2 gol urib, bitta golga hammuallif bo‘ldi.

«Inter» «Real»ning yana bir himoyachisi Daniloga qiziqish bildirmoqda, bu futbolchi uchun «Arsenal» va «PSJ» ham da'vogar.