Hindistonda eng qudratli raketa tashuvchi sinovi o‘tkaziladi

Hindiston kosmik tadqiqotlar tashkiloti (HKTT) iyun oyining dastlabki kunlarida og‘ir mahalliy raketa tashuvchisi sinovini o‘tkazishni rejalashtirmoqda. NDTV telekanalining xabar berishicha, yangi raketa milliy boshqariluvchi kosmik dasturni amalga oshirish imkonini beradi. 

GSLV MK-III tashuvchisi (yoki LVM3 - Launch Vehicle Mark-3) 8 tonnaga yaqin foydali yukni orbitaga olib chiqishga qodir. Manbada ta'kidlanishicha, bu Hindistonda ishlab chiqarilgan eng qudratli va og‘ir raketadir. Uning og‘irligi 200 fil og‘irligi (640 tonnadan ortiq)ga to‘g‘ri keladi va u to‘liq hind texnologiyalari asosida ishlab chiqilgan.

Tashuvchining birinchi parvozi muvaffaqiyatli kechsa, yaqin kelajakda uning yordamida kosmosga Hindiston hududidan Hindiston raketasida Hindiston ekipaji yo‘llanadi. Mazkur reja muvaffaqiyatli o‘tsa, Hindiston Rossiya, Xitoy va AQShdan keyin kosmik kenglikka insonlarni mustaqil chiqara oladigan dunyoning to‘rtinchi mamlakati bo‘ladi. Yangi tashuvchi yordamida shuningdek turli maqsadlardagi sun'iy yo‘ldoshlar ham orbitaga olib chiqiladi.