Moskvada dovul vaqtida halok bo‘lganlar oilalariga 1 mln rubldan beriladi

Moskva ma'muriyati 29 may kuni shaharda yuz bergan dovul oqibatida halok bo‘lganlar oilalariga 1 mln rubldan tovon puli to‘laydi. Bu haqda shahar meri Sergey Sobyanin 29 may kuni N.V.Sklifosovskiy nomidagi tez yordam ilmiy-tadqiqot institutiga tashrifi vaqtida ma'lum qildi. 

"Halok bo‘lganlar oilalariga bir milliondan to‘laymiz. Tegishli qaror ertaga hukumat yig‘ilishida qabul qilinadi", deb aytdi Moskva meri va dovuldan jarohat olganlarga ham tovon puli to‘lanishini qo‘shimcha qildi.

"Moskvada fojiali voqealar yuz berdi, tabiiy ofat, dovul oqibatida 11 kishi halok bo‘ldi va 70 kishi jiddiy jarohat oldi. Jarohatlanganlarga tegishli tibbiy yordam ko‘rsatilmoqda. Ertaga Moskva hukumati yig‘ilishida moliyaviy kompensatsiya berish haqida qaror qabul qilinadi, biroq, afsuski, hech qanday pullar bilan insoniy yo‘qotishlarni, odamlar fojiasini qoplab bo‘lmaydi. Men halok bo‘lganlar oilalariga va jarohatlanganlarga hamdardlik bildiraman", deb aytgan Sobyanin.

Mer institutga keltirilgan jabrlanganlar bilan muloqot qilib, ularga tez fursatda sog‘ayib ketishlarini tilab qolgan.

Ma'lum qilinishicha, institutga keltirilgan jabrlanuvchilarda ko‘plab lat yeyishlar, turli jarohatlar qayd qilingan. 

Moskvada transport harakati dovuldan keyin to‘liq tiklangan. 

Eslatib o‘tamiz, 29 may kuni Moskva shahri va Moskva viloyatida tezligi 28 m/soniyani tashkil qilgan dovul va jala kuzatildi. Dovul oqibatida 11 kishi halok bo‘lgan. Moskvada jarohatlanganlar soni 100 dan oshib ketgan. Ular shaharning 10 ta shifoxonasiga yetkazilganlar.

Qutqaruvchilar, kommunal va yo‘l xizmatlari, energetiklar dovul oqibatlarini bartaraf etishga kirishib ketishgan. Rossiya favqulodda vaziyatlar vazirligida ma'lum qilinishicha, Rossiyaning markaziy qismi va Moskvada aholisi 4000 kishidan ko‘proq bo‘lgan 20 dan ko‘proq aholi punkti elektr energiyasiz qolib ketgan, 1000 dan ko‘proq daraxat qo‘porib yuborilgan, 30 dan ortiq ko‘p qavatli va xususiy uylarning tomlariga, o‘nlab mashinalarga shikast yetgan.