10:01 / 31.05.2017
5635

BMT: Suriya hukumati gumanitar karvonlardan dorilarni olib qo‘ymoqda

Suriya hukumati yil boshidan beri turli qurolli guruhlar nazoratidagi tumanlarga yuborilayotgan gumanitar avtokarvonlardan 100 mingga yaqin dorilar, jarrohlik anjomlari va boshqa tibbiy jihozlarni olib  qo‘ydi. Bu  haqda BMT bosh kotibining gumanitar masalalar bo‘yicha o‘rinbosari Stiven O'Brayyen Xavfsizlik kengashi majlisida ma'lum qildi. 

"Hayot uchun muhim dorilar va tibbiyot anjomlari, xususan, jarrohlik va akusherlik, birinchi tibbiy yordam ko‘rsatish to‘plamlarini olib qo‘yish davom etmoqda. Yil boshidan beri salkam 100 ming dori-darmon kiritilmadi yoki avtokarvonlardan olib qo‘yildi", - degan BMT bosh kotibi o‘rinbosari. Uning so‘zlariga ko‘ra, Suriya hukumati "siyosiy maqsadlar" sababli dorilarga to‘sqinlik qilmoqda va uni "harbiy taktika"ga aylantirmoqda.

Stiven O'Brayyenning ta'kidlashicha, aholiga yordam ko‘rsatishga ko‘maklashish – bu ziddiyatli tomonlar majburiyatidir va bu "bosish mumkin bo‘lmagan qizil chegaradir". "Yordamning kirishiga ruxsat bermaslik yoki uni cho‘zish XK rezolyutsiyalari va xalqaro gumanitar huquqqa ziddir. Bu jarayon barham topishi kerak. Men Kengashni rezolyutsiya bajarilishi uchun harakat qilishga chaqiraman", - deya ta'kidlagan O'Brayyen. 

U, shuningdek, vaqti-vaqti bilan tibbiyot muassasalariga uyushtirilayotgan hujumlardan tashvish bildirdi. Uning so‘zlariga ko‘ra, 2017 yilning o‘tgan har oyida 20ga yaqin shunday xuruj amalga oshirilgan. Bu har 36 soatda Suriyadagi klinika yoki shifoxonaga hujum qilinishini anglatadi.

Xavfsizlik kengashi majlisida G‘arb davlatlari diplomatlari amaldagi Suriya hukumatini tanqid qilib, insonlarning o‘limi va jabr chekishida rasmiy Damashq hamda uning ittifoqchilarini mas'ul deyishdi. 

Xususan, AQShning BMTdagi doimiy vakili Nikki Xeylining bayonot berishicha, mamlakat hukumati "hayot uchun o‘ta muhim bo‘lgan oziq-ovqat va tibbiyot anjomlarini yetkazishda ma'muriy-bo‘yruqbozlik to‘siqlarini barpo etishda davom etmoqda". "Ular o‘zlarining o‘yinlari bilan hech kimni alday olmaydi. Ular tanlovini amalga oshirishdi – siyosiy maqsadlariga erishish uchun o‘z xalqini ochdan o‘ldirishni xohlaydi. U Eronning qo‘llab-quvvatlashiga erishayotgan bir vaqtda Rossiya o‘zini ko‘rmaganga olmoqda", - degan Amerika vakili.

O‘z navbatida, RFning BMTdagi doimiy vakili o‘rinbosari Vladimir Safronkov "so‘nggi vaqtlarda oddiy aholi orasida ko‘plab qurbonlar AQSh yetakchiligidagi koalitsiya nazoratidagi hududlarda qayd etilayotgani"ga e'tibor qaratdi.  "Agar siz adolat uchun kurashar ekansizlar, nima uchun bu haqda aytmaysizlar? Axir, bu kabi jangovar amaliyotlar Suriya suvereniteti va hududiy yaxlitligini buzayotgan  noqonuniy amaliyotlar ekani XKning qator rezolyutsiyalarida bir necha marotaba qayd etilgan", - degan diplomat.

U, shuningdek, jangarilardan ozod etilgan hamda qurolli tuzilmalar, ularning oila a'zolarini ko‘chirishni ko‘zda tutuvchi sulhga erishilgan tumanlarda vaziyat barqarorlashganini ta'kidladi. "Ushbu amaliyotlarni tanqid qilayotganlar unutmasliklari kerak, hududlarda sulhga erishish bilan 10 minglab odamlarning umri saqlab qolindi", - deya qayd etgan Safronkov. 

Mavzuga oid
Top