Mazlum Abdi bu haqda 25-avgust kuni Damashqda Suriya muvaqqat hukumati vakillari bilan oʻtkazilgan muzokaralar chogʻida maʼlum qilgan.
Uning soʻzlariga koʻra, kurd avtonom maʼmuriyatining fuqarolik va harbiy institutlari Suriyaning isloh qilinayotgan davlat institutlariga integratsiya qilinadi. Shu munosabat bilan kurdlarning mustaqil qurolli tuzilmalari faoliyati tugatiladi.
Suriyaning SANA axborot agentligi Abdiga tayanib xabar berishicha, mamlakatning yangi hukumati kurd tilini maktablarda oʻqitish huquqini saqlab qoladi. Kurd qurolli tuzilmalari aʼzolari esa Suriya armiyasining brigadalari tarkibiga kiritiladi.
Abdi bu jarayon «tinchlik, barqarorlik va yangi Suriyani barpo etish»ga xizmat qilishini taʼkidlagan.
Shu kuni Suriya muvaqqat prezidenti Ahmad ash-Sharʼa ham Mazlum Abdi boshchiligidagi delegatsiyani Damashqdagi Xalq saroyida qabul qilgan. Uchrashuvda kurdlarni mamlakat davlat tizimiga integratsiya qilish bilan bogʻliq hal etilmay qolgan masalalar muhokama qilingan.
SDF safida 100 minggacha jangchi boʻlgan
Suriyaning shimoliy va shimoli-sharqiy hududlarida, Turkiya va Iroq bilan chegaradosh mintaqalarda kurdlar katta jamoa boʻlib yashaydi. Bu yerlarda, shuningdek, arablar, assuriylar, turkmanlar va boshqa etnik guruhlar ham istiqomat qiladi.
Suriyadagi uzoq davom etgan fuqarolik urushi yillarida mamlakatning shimoli va shimoli-sharqidagi bir qator hududlar amalda kurd avtonomiyasiga aylangan. Bu hudud Rojava yoki Suriya Kurdistoni nomi bilan ham tanilgan.
Mahalliy qurolli kuchlar keyinchalik «Suriya demokratik kuchlari» alyansiga birlashgan. Maʼlumotlarga koʻra, 2024-yilda SDF safida 100 minggacha jangchi boʻlgan va u mamlakatdagi eng yirik qurolli tuzilmalardan biri hisoblangan.
Kurd kuchlari Suriyadagi urush davomida ISHID terrorchilik tashkilotiga, shuningdek, Bashar Asad hukumati kuchlariga qarshi jang qilgan. Biroq Asad hokimiyatining agʻdarilishida SDF mustaqil yirik harbiy kuch sifatida bevosita ishtirok etmagan.
Bashar Asad hukumati qulaganidan soʻng SDF hokimiyatning muvaqqat hukumatga oʻtishini qoʻllab-quvvatlagan, biroq kurd avtonomiyasini saqlab qolishni talab qilgan.
