Suriya Tashqi ishlar vazirligi vakilining 23-avgust kuni maʼlum qilishicha, oʻtish hukumati tashqi ishlar vaziri Asad ash-Shayboniy boshchiligidagi Suriya delegatsiyasi Iordaniyada Isroil vakillari bilan uchrashgan. Suriya delegatsiyasi tarkibiga mamlakat maxsus xizmatlari vakillari ham kirgan.
Damashq rasmiylariga koʻra, muzokaralar AQSH vositachiligida tashkil etilgan boʻlib, undan koʻzlangan asosiy maqsad ikki davlat oʻrtasidagi keskinlikni pasaytirish va yangi toʻqnashuvlarning oldini olishdan iborat.
Suriyaning SANA davlat axborot agentligi uchrashuvni Isroil tomonidan Suriya hududiga soʻnggi bor berilgan zarbalardan keyin vaziyatni yumshatishga qaratilgan saʼy-harakatlarning bir qismi deb atagan.
AFP: Suriya TIV rahbari «Mossad» boshligʻi bilan uchrashgan
AFP agentligi Suriyadagi diplomatik va hukumat manbalariga tayanib xabar berishicha, Asad ash-Shayboniy Isroil tashqi razvedka xizmati - «Mossad» rahbari Roman Gofman bilan muzokara oʻtkazgan.
Uchrashuvda tomonlar qator xavfsizlik masalalarini, jumladan Iordaniya hududida AQSH nazorati ostida «maxsus operatsiyalarni boshqarish markazi»ni tashkil etish imkoniyatini muhokama qilgan.
Agentlik maʼlumotiga koʻra, bunday markazning asosiy vazifasi Suriya hududida ehtimoliy toʻqnashuvlarning oldini olish boʻladi. Xususan, Turkiya ishtirokida yuzaga kelishi mumkin boʻlgan ziddiyatlarni bartaraf etish ham mazkur mexanizm vazifalaridan biri boʻlishi kutilmoqda.
Joriy yil yanvar oyida ham Suriya va Isroil AQSH vositachiligida oʻzaro aloqa kanalini tashkil etgani haqida xabarlar tarqalgan edi. Ushbu mexanizm savdo, xavfsizlik va maxsus xizmatlar faoliyati bilan bogʻliq masalalarni muvofiqlashtirish uchun moʻljallangan.
Isroil Suriyadagi aerodromga zarba bergan edi
Muzokaralar ikki davlat oʻrtasida navbatdagi keskinlik yuzaga kelgan bir paytda boshlandi.
18-avgust kuni Isroil harbiylari Suriyaning shimoli-gʻarbidagi Idlib viloyatida joylashgan Abu-ad-Duhur tashlandiq harbiy aerodromiga zarba bergan.
Isroil tomoni zarbaga ushbu hududda Turkiya qoʻshinlari joylashtirilishi mumkinligi bilan bogʻliq xavfsizlik tahdidi sabab boʻlganini bildirgan.
Anqara esa Abu-ad-Duhur aerodromida Turkiya harbiylari borligi haqidagi xabarlarni rad etgan. Suriya oʻtish hukumati Isroil zarbasini «asossiz tajovuzkorlik harakati» deb baholagan.
