Suriyalik rassom Tramp va Putinni chorasiz qochqinlar ko‘rinishida tasvirladi

Dubaydagi Ayam galereyasida suriyalik rassom Abdulloh Al-Umariyning "Zaiflik" nomli ko‘rgazmasi ochildi. Ko‘rgazmada rassomning jahon yetakchilarining urush tufayli uylarini tark etishga majbur bo‘lgan qochqinlar ko‘rinishidagi suratlari namoyish qilinmoqda. Bu haqda galereya saytida ma'lum qilindi.  

Suratlarda qochqinlar ko‘rinishida Donald Tramp, Vladimir Putin, Bashar Asad, Kim Chen In, Boris Jonson, Tereza Mey, Nikolya Sarkozi, Fransua Olland, Devid Kemeron, Barak Obama, Angela Merkel kabi siyosatchilarni ko‘rish mumkin.

Rassomning o‘zi Suriyadan urush tufayli qochishga majbur bo‘lgan. U ayni vaqtda Belgiyada yashaydi. U suratlari orqali jahon yetakchilari ham "zaif" ekanliklarini ko‘rsatishga harakat qiladi. Uning suratlarida jahonning kuchlilari gadoylar, qochqinlar va boshpanasiz odamlar ko‘rinishida tasvirlangan.

U suratlaridan birida o‘zini qochqinlar ko‘rinishidagi jahon yetakchilari bilan birga ovqat uchun navbatda turgan alfozda tasvirlagan. 

Ko‘rgazmaning matbuot bayonotida rassom bu suratlarni siyosatchilar ustidan kulish yoki ularni fosh qilish maqsadida yaratmagani aytilgan. U shunchaki ularni hokimiyat elementlarisiz: kostyumsiz, orqalarida hilpirab turuvchi bayroqlarsiz tasvirlashga harakat qilgan. Ular bunday alfozda ancha insoniyroq ko‘rinishadi.

"Men bu siyosatchilardan hokimiyatni o‘zim uchun yoki dardimni yupatish uchun emas, ularga insoniylikni qaytarish uchun tortib olishni istayman", deb aytgan rassomning o‘zi.