"Boko Harom" jangarilari Nigeriyadagi yirik shaharga hujum qilishdi

"Boko Harom" ekstremistik guruhi jangarilari Nigeriya shimolidagi, aholisi 1 mln kishidan ko‘proqni tashkil qiluvchi Mayduguri shahriga hujum qilishdi. 

Ta'kidlanishicha, bu jangarilarning oxirgi 1,5 yil ichidagi eng yirik hujumidir.  

Guvohlarning aytishicha, shaharning janubi-sharqiy va janubi-g‘arbiy qismlarida bir soat davomida o‘q va portlash ovozlari yangrab turgan.

Shahar Borno shtati ma'muriy markazi hisoblanadi. Shtat gubernatori jangarilarning hujumi haqidagi ma'lumotni tasdiqladi va armiya hujumni qaytara olganini ma'lum qildi. Harbiylar ham hujum qaytarilgani haqida hisobot berishgan.

Ayni vaqtda qurbonlar haqida ma'lumotlar yo‘q. Ta'kidlanishicha, hujumda xudkushlar ishtirok etgan.

Nigeriya armiyasi 2016 yil oxirida jangarilarni mamlakat shimolidagi oxirgi tayanch punktlaridan biridan siqib chiqargandi.