Bu haqda 28-sentabr, dushanba kuni ertalab Xarkiv viloyati harbiy maʼmuriyati rahbari Oleg Sinegubov va shahar meri Igor Terexov oʻz Telegram-kanallarida maʼlum qildi.
Terexovning soʻzlariga koʻra, shaharning shimoli-sharqiy qismidagi Kiyev va Saltov tumanlariga boshqariladigan aviabombalar bilan zarba berilgan. Oqibatda bir nechta koʻp qavatli uyga shikast yetgan.
Mer vaziyat markazi maʼlumotlariga tayanib, Saltov tumanida aviabomba bevosita koʻp kvartirali turar joyga tushganini bildirgan.
«Zarba koʻp kvartirali uyning ikkinchi qavatiga toʻgʻri kelgan. Turar joyning ikkinchi va uchinchi qavatlari vayron boʻlgani qayd etildi», - deya aniqlik kiritgan Sinegubov.
Kiyev va uning atrofidagi hujumlarda uch kishi halok boʻldi
Rossiya armiyasi bundan oldingi tunda ham Ukrainaga hujum qilgan. Kiyevda Rossiya dronlari hujumi oqibatida bir erkak halok boʻlgan.
Ukraina Favqulodda vaziyatlar davlat xizmati maʼlumotiga koʻra, qutqaruvchilar uning jasadini shaharning Solomensk tumanidagi noturar bino yongʻinini oʻchirish vaqtida topgan. Binoda dron zarbasidan keyin yongʻin chiqqan.
Bundan tashqari, 27-sentabr oqshomida Kiyev yaqinidagi Sofiyevskaya Borshchagovka qishlogʻida bozorga dron kelib tushishi oqibatida ikki kishi halok boʻlgan, yana toʻrt kishi yaralangan. Bu dastlabki maʼlumotlarni Ukraina poytaxti meri Vitaliy Klichko eʼlon qilgan.
Ukraina prezidenti Volodimir Zelenskiyning bildirishicha, oʻsha kuni Kiyevning bir nechta tumanida dron zarbalari qayd etilgan, oʻnlab kishi jabrlangan.
«Kechadan buyon rossiyaliklar turli rusumdagi jami 277 ta zarba beruvchi dronni qoʻlladi. Ularning 155 tasi reaktiv dronlar», - degan Zelenskiy.
