Rossiyaning Kursk viloyatiga uchuvchisiz uchish apparatlari (dron) bilan amalga oshirilgan hujum oqibatida bir kishi halok bo‘ldi, yana olti nafar fuqaro turli darajada jarohat oldi. Bu haqda viloyat gubernatori Aleksandr Xinshteyn ma’lum qildi.
Uning so‘zlariga ko‘ra, dron Bolshesoldatskiy tumanidagi Kozirevka qishlog‘ida joylashgan xususiy uyga kelib urilgan. Hodisa oqibatida bir inson halok bo‘lgan, yana olti kishi jarohatlangan.
Belgorod viloyatida ham dronlar hujumi oqibatida ikki kishi jabrlangan. Viloyat tezkor shtabi ma’lumotiga ko‘ra, Shebekino shahrida «Orlan» ko‘ngillilar bo‘linmasi jangchilaridan biri yaralangan.
Yana bir jabrlanuvchi Maslova Pristan posyolkasida yashovchi erkak bo‘lib, uning avtomobiliga dron hujum qilgan. U mina portlashi jarohatini olgan holda mustaqil ravishda shifoxonaga murojaat qilgan.
Ayni paytda Rossiya poytaxti Moskvaga ham dronlar hujumi uyushtirishga urinish bo‘lgani xabar qilindi. Moskva meri Sergey Sobyaninning ma’lum qilishicha, 6-avgustga o‘tar kechasi shahar tomon harakatlangan uchta uchuvchisiz apparat havo hujumidan mudofaa kuchlari tomonidan yo‘q qilingan. Dastlabki ma’lumotlarga ko‘ra, hodisa oqibatida jabrlanganlar yoki vayronagarchilik qayd etilmagan.
Shuningdek, Yaroslavl viloyatida ham dronlar hujumi xavfi e’lon qilindi. Viloyat rahbari Mixail Yevrayev Yaroslavl shahridan Moskva yo‘nalishiga chiqish qismida transport harakati vaqtincha cheklanganini ma’lum qildi. U aholidan ushbu yo‘nalish bo‘ylab safarlarni kechiktirish yoki aylanma yo‘llardan foydalanishni so‘radi.
