DW xabariga koʻra, Nigeriya Sogʻliqni saqlash vazirligi bu haqda 20-oktabr kuni maʼlum qilgan. Virus Ugandadan samolyotda kelgan ayolda topilgan.
Uganda Sogʻliqni saqlash vazirligi bemor Nigeriya fuqarosi ekanini va mamlakat hududidan faqat tranzit sifatida foydalanganini aniqlashtirgan. U bunga qadar Kongo Demokratik Respublikasining sharqiy qismida xizmat safarida boʻlgan.
Ugandada avval ham Ebola bilan kasallanish holatlari qayd etilgan, biroq keyinchalik rasmiylar mamlakatda faol holatlar qolmaganini eʼlon qilgan edi.
Kongo Demokratik Respublikasida esa Bundibugyo virusi keltirib chiqargan Ebola kasalligining avj olishi may oyidan beri davom etmoqda. DW keltirgan sentabr oʻrtalaridagi maʼlumotlarga koʻra, mamlakatda 7 mingdan ortiq kasallanish holati tasdiqlangan, 3 300 dan ziyod kishi vafot etgan.
Mamlakatda hukumat kuchlari va isyonchi guruhlar oʻrtasida davom etayotgan qurolli mojaro kasallik tarqalishini cheklash ishlarini qiyinlashtirmoqda.
Nigeriyadagi yangi holatdan soʻng rasmiylar bemor bilan ehtimoliy aloqada boʻlgan shaxslarni aniqlash va kuzatish ishlarini olib bormoqda.
