10:34 / 23.06.2017
14633

Qozog‘iston Suriyaga harbiylari yuborilishi borasida o‘z pozitsiyasini bildirdi

Foto: AP

Qozog‘iston o‘z harbiy xizmatchilarini Suriyaga yuborish bo‘yicha hech kim bilan muzokaralar olib borayotgani yo‘q. Bu haqda Qozog‘iston TIV rahbari Qayrat Abdurahmanov jurnalistlarga ma'lum qildi.

Uning ta'kidlashicha, "Suriyadagi harbiy harakatlardan xoli to‘rtta hududdagi xavfsizlik va samaradorlikni ta'minlash masalasi ayni damda Ostona jarayoni kafil-davlatlari ixtiyoridadir (Rossiya, Turkiya, Eron – tah.). Ular bu va boshqa masalalarni Ostonada 4-5 iyul kunlari bo‘lib o‘tadigan uchrashuvda muhokama etadi".

"Bizning davlat uchun tinchlikparvar kuchlarimizni dunyodagi istalgan qaynoq nuqtaga yuborish imkoniyatini ko‘rib chiqishda BMT XK rezolyutsiyasi va butunjahon tashkilotining tegishli mandati bor ekani juda muhim talabdir", - deya ma'lum qildi Abdrahmanov.

Vazirning so‘zlariga ko‘ra, Qozog‘iston manfaatdor tomonlarga uchrashuv uchun joy taqdim etib, Suriya inqirozini hal etish jarayoniga hissa qo‘shmoqda.

Avvalroq Turkiya prezidenti vakili Ibrohim Qalin Rossiya Suriyadagi harbiy harakatlardan xoli nuqtalarga Qirg‘iziston va Qozog‘istondan harbiylarni jo‘natish taklifini ilgari surgani haqida gapirgani ma'lum qilingandi.

Mavzuga oid
Top