Vazir: Har qanday fuqaro o‘qishini ko‘chirishga ariza bera oladi hamda u albatta ko‘rib chiqiladi 

Kun.uz tahririyati O‘zbekiston Oliy va o‘rta maxsus ta'lim vaziri Inomjon Majidov bilan ochiq muloqot o‘tkazdi.

Majidovning aytishicha, boshqa mamlakatdan O‘zbekistondagi OTMga o‘qishni ko‘chirish masalasida har doim arizani topshirish imkoniyati har bitta viloyatdagi OTMda yaratiladi. Ma'lum qilinishicha, ularning qaysidir qismini oliy o‘quv yurtining o‘zi hal qilib ko‘chirishi mumkin. Aytilishicha, bu yil o‘qishni respublika OTMlariga ko‘chirish bo‘yicha ariza topshirish mumkin, qolgan ma'lumotlar hozircha noma'lum. 

“Ariza topshirishga hech qachon yo‘q deyilmagan. Ko‘chirish masalasida har doim ham arizani topshirish imkoniyati yaratilgan. Uning tartibi bor. Qaysidir qismini oliy o‘quv yurtining o‘zi hal qilib, ko‘chirishi mumkin. Qaysidir qismi esa ikkita oliy o‘quv yurti ichida bo‘ladi. Buni tegishli vazirlik hal qiladi.

Xorijdagi ma'lum bir universitetlar oliy ta'limni ham tijoratga qo‘ygan. Bu balki normal holat. Bizda bunday emas. Bizda talab bor, bitirayotgan mutaxassisning malakasiga ertaga javobgarlik bor. Shuning uchun xorijdagi barcha oliy o‘quv yurtini bir xilda qabul qilib bo‘lmaydi. Lekin har qanday fuqaro o‘qishini ko‘chirishga ariza bera oladi hamda u albatta ko‘rib chiqiladi”, - deydi vazir.