Bu tartib prezidentning 2026-yil 29-sentabrdagi «Oliy taʼlimda dual taʼlim shaklida kadrlar tayyorlash tizimini takomillashtirish chora-tadbirlari toʻgʻrisida»gi PF–209-son farmonida belgilandi.
Hujjatga koʻra, yuqori malakali kadrlarni tayyorlashda «korxona – oliygoh – maqsadli kadr» tamoyili joriy etiladi. Kadrlar ish beruvchi korxonalarning buyurtmalari asosida tayyorlanadi.
Qabul qanday amalga oshiriladi?
Dual taʼlim shakli boʻyicha qabul qilinadigan bakalavriat yoʻnalishlari va qabul parametrlarini oliy taʼlim muassasasining oʻzi belgilaydi. Bunda ular Oliy taʼlim, fan va innovatsiyalar vazirligi bilan kelishilishi kerak.
Qabul ish beruvchi korxonaning buyurtmasiga muvofiq, toʻlov-kontrakt asosida har yili 1-oktabrga qadar amalga oshiriladi.
Talabaga qancha maosh toʻlanadi?
Dual taʼlim oliy taʼlim muassasasi, korxona va talaba oʻrtasida tuziladigan uch tomonlama shartnoma asosida tashkil etiladi.
Shartnomaga koʻra, korxona talabaga butun oʻqish davri davomida har oy mehnatga haq toʻlashning eng kam miqdoridan kam boʻlmagan ish haqi toʻlashi shart.
Shuningdek, kadrlar tayyorlash tizimi bitiruvchini buyurtma bergan korxonaga ishga qabul qilish shartini nazarda tutadi.
Talabaning ham majburiyati boʻladi
Talaba oʻqishni tamomlaganidan soʻng mazkur korxonada kamida ikki yil ishlab berishi kerak. Ushbu majburiyat ham uch tomonlama shartnomada belgilanadi.
Shu tariqa, yangi tizimda korxonaning kadrga boʻlgan ehtiyoji, oliygohdagi taʼlim va bitiruvchining keyingi ish faoliyati oʻzaro bogʻlanadi.
