9 yildan beri bir xil va'da. Ichimlik suvi bilan ta'minlash shunchalik mushkulmi?

Qashqadaryo viloyatiga uyushtirilgan safar davomida turli mavzular bo‘yicha fuqarolar bilan uchrashdik. Ma'lumki, Kun.uz ijodiy jamoasi safari chog‘ida inson hayotining birlamchi ehtiyojlari - toza ichimlik suvi mavzusiga alohida to‘xtaladi. Boisi ayni mavzu yuzasidan bizga ko‘plab murojaatlar kelib tushmoqda.  

Bu muammo Qashqadaryo viloyatiga ham begona emas. Ijodiy jamoa toza ichimlik suvi bilan bog‘liq ana shunday murojaatlardan birini o‘rganish yuzasidan Qarshi shahar “Qilichbek qo‘rg‘oncha” mahallasiga yo‘l oldi. Bizni mahalla faollaridan biri kutib oldi va murojaat bayon etilgan holat bo‘yicha tanishtirdi. 

Uning aytishicha, 2008 yil 1 aprelda suv o‘tqazish haqida va'da berilgan. Biroq, o‘shanda beri suv yo‘q. 

“Necha marotaba xat qildik, chiqdik. Suv masalasi qiyin. Mana hozir oqava suv berishdi. Hammaning xonadonida daraxt, turli ekinlar. Oqava suv o‘tib, yaxshi bo‘lib qoldi. Ichimlik suv muammo. Bu yerda 650 ga yaqin xo‘jalik yashaydi. Ularning bir qismida ikki mahalgina suv bera oladi. U ham yozni kunida to‘xtab qoladi. Kuz, qish, bahor oylarida suv kelib turadi. Qolganlarning hammasi suvni sotib oladi. 60 ming so‘mga 6 tonna suv olinadi. Uyimizda havza qilingan. Hammada shunday. Bu muammoni ko‘p olib chiqqanmiz. Qarshi shahar hokimligiga, viloyat hokimligiga murojaat qilganmiz o‘sha paytda. Viloyat hokimining o‘zi kelgandi. Ko‘rildi, keyin lotoklarni yo‘lga qo‘yib berishdi. Hozir qisman mahallamizga gaz ham yetib keldi”, - dedi mahalla faoli G‘ani Fayziyev.

Kun.uz ijodiy jamoasi mazkur muammo yuzasidan viloyat hokimligi mutasaddilariga murojaat qilganida, ulardan “aholi muammosini ijobiy hal qilishlari” haqida javob olgandi. Qashqadaryo safaridan qaytilganiga qariyb ikki oy o‘tdi va biz mazkur muammo taqdiri bilan qiziqdik. Mahalla faoli G‘ani Fayziyev bilan bog‘landik. 

Uning so‘zlariga ko‘ra, mutasaddi tashkilot 4-5 kunlar avval mahalla raisini chaqirib, uchrashuv o‘tkazilishi haqida aytgan. 

“Keyin kelishdi. Muammoni aytishgan – suv masalasi yo‘qligini aytishgan. Hamma uni bilamiz, qilib berishga harakat qilamiz, degan. 2008 yildagi va'da yana qaytarildi. Mana 2017 yil bo‘ldi, hali ham natija yo‘q. Suvni sotib olib, ichib yuribmiz”, - dedi mahalla faoli.

Guvohi bo‘lganingizdek, muammo muammoligicha qolmoqda. Kun.uz ushbu murojaatga viloyat mutasaddi rahbarlari e'tibor qaratishlarini so‘raydi. 

Toza ichimlik suvi ichishni orzu qilayotgan aholining umidlari doimgidek chipakka chiqishini biz qatori ular ham istamaydilar, degan niyatdamiz.