15:04 / 08.08.2017
24567

Andijonda zamonaviy ochiq suv havzasi foydalanishga topshirildi

Andijon olimpiya zaxiralari kollejida zamonaviy suv havzasi ishga tushdi. Mazkur inshootda suvda suzish sport bilan shug‘ullanuvchilar hamda turli musobaqalar o‘tkazish uchun barcha sharoitlar mavjud. 

Ochiq suv havzasining o‘lchami 50x25 bo‘lib, jahon standarti talablariga mosdir. Sport maskanida hozirda 120 nafardan ziyod o‘quvchilar hamda suzishga qiziqqan havaskorlar shug‘ullanmoqda. 

Inshootning ishga tushishi munosabati bilan tashkil etilgan tadbirda viloyat jismoniy tarbiya va sport ishlari boshqarmasi boshlig‘i Ozodbek Saidov so‘z olib, yosh sportchilarni  arenaning ochilishi bilan tabriklab, ularga muvaffaqiyatlar tiladi.

Shundan so‘ng olimpiya zaxiralari kolleji tarbiyalanuvchilari va suzish sport turi bilan shug‘ullanayotgan o‘quvchilar ko‘rgazmali chiqishlar namoyish etdi.

Suzish sporti bo‘yicha Andijon maktabi respublikada yetakchi o‘rinlarda turadi. O‘tgan 2016 yili Braziliyada o‘tkazilgan paraolimpiya musobaqalarida viloyatda kamol topgan Firdavs Musabekov, Muzaffar Tursunxo‘jayev, Muslima Odilova singari yosh sportchilar oltin va kumush medallarni qo‘lga kiritgan. 

Kun.uz muxbiri Elmurod Ermatov, Andijon

Mavzuga oid
Top