Respublikachilar Trampning Sharlotsvilldagi hodisalar bo‘yicha so‘zlarini qo‘llab-quvvatlashmadi

AQSh Respublikachilar partiyasi vakillari prezident Donald Trampning Sharlotsvill shahridagi to‘qnashuvlar yuzasidan bildirgan so‘zlarini tanqid qilishdi, deb yozmoqda Politico nashri.

«Barchamiz birdam bo‘lishimiz va nafrat ortida turgan barcha narsani qoralashimiz lozim. Amerikada bunday zo‘ravonlikka joy yo‘q», - deya yozgan Tramp hodisadan so‘ng tvitterda.

Nashrning ta'kidlashicha, u zo‘ravonlikni namoyishning «ko‘plab vakillari tomonidan» qoralagan, shu bilan birga, ultra o‘nglarni alohida ajratmagan. Bu esa nafaqat demokratlar, balki respublikachilarning ham tanqidiga sabab bo‘ldi.

«Janob prezident, biz yovuzlikni o‘z nomi bilan atashimiz kerak. Bu oq irqchilar edi, hamda bu ichki terrorizm holatiga aylandi», - deya ma'lum qilgan senator Kori Gardner o‘z tvitterida.

Senator Marko Rubio Sharlotsvilldagi hodisalarni «oq irqning ustunligi» tarafdorlari tomonidan amalga oshirilgan «terakt» deb atadi.

«Biz yovuzlikni o‘z nomi bilan atashimiz kerak», - deya ta'kidlab o‘tdi Yuta shtatidan senator Orrin Xetch.

Nashrning ta'kidlashicha, Tramp va respublikachilar orasidagi ajralish Oq uyning qator siyosiy masalalar bo‘yicha ishini murakkablashtirishi mumkin.

Avvalroq Sharlotsvill meri shahardagi tartibsizliklarda Trampni ayblagandi.