Komilov Hindiston vitse-prezidenti bilan muzokarada. Ikki davlat o‘rtasida tovar ayirboshlash hajmi oshiriladi

O‘zbekiston Tashqi ishlar vaziri Abdulaziz Komilov va Hindiston vitse-prezidenti Venkay Naydu Dehlida muzokara o‘tkazdi. Bu uchrashuv Abdulaziz Komilov boshchiligidagi delegatsiyaning Hindistonga uyushtirgan rasmiy tashrifi doirasida ro‘y bergan.

Venkay Naydu O‘zbekiston va Hindiston o‘rtasidagi tovar ayirboshlash hajmi 2018 yil martiga qadar 1 milliard dollarga yetkazilishi zarurligi qayd etib o‘tgan.

U O‘zbekiston va Hindiston qalin madaniy va tarixiy aloqalarga egaligini ta'kidlagan. U O‘zbekistonda ikki davlat o‘rtasida munosabatlar yo‘lga qo‘yilganiga 25 yil to‘lishi munosabati bilan o‘tkazilgan tadbirlardan qoniqish hosil qilganini aytgan.

Tashqi ishlar vaziri Abdulaziz Komilov ham o‘z navbatida O‘zbekiston delegatsiyasining Hindistonga bu tashrifi munosabatlar darajasini yangi bosqichga olib chiqishiga ishonch bildirgan.