«Farzandim - chempion» yoxud bolalar sportiga asoslangan tadbirkorlik bozori

Kichik Joui Erachining xonasida o‘nga yaqin kuboklar va u o‘ynagan jamoa logotipi tushirilgan beysbolkalar mavjud. U yashaydigan uyning hovlisida 15 ming AQSh dollari evaziga qad ko‘targan maxsus beysbol bilan shug‘ullanish maydonchasi bo‘lib, unda Joui soatiga 100 AQSh dollar haq bilan ishlaydigan shaxsiy murabbiyi bilan shug‘ullanadi. Instagram tarmog‘ida Joui Beysbol taxallusi bilan mashhur bo‘lgan bolakayni 26 ming kishi kuzatib boradi. Shaharchada ham uni ko‘pchilik taniydi, ammo Joui dastxat bera olmaydi, chunki u endigina 10 yoshni qarshiladi va dastxat berishni bilmaydi.

Ota-onalar, farzandining tezroq g‘alabaga erishishi, qolgan tengdoshlaridan ustunligini ko‘rish uchun, daromadining katta qismini bolalar sportiga sarflashi faqat AQShda emas, balki butun dunyo bo‘ylab kuzatilayotgan holatdir. Bolalar futbol jamoasi, sport akademiyasi - bularning barchasi ota-onaning e'tibori uchun kurashmoqda hamda farzandining sport yo‘nalishida porloq kelajagi borligiga ishonadi.

Erachining oilasidagilar Jouining sport bilan shug‘ullanishi uchun deyarli 30 ming AQSh dollari sarflab bo‘ldi. Ikki nafar kichik sportchining onasi haftasiga uch marta, bir yarim soatdan mashg‘ulotlar zalida farzandlarini kutib o‘tirishini aytib o‘tgan. Time nashrining yozishicha, farzandining kamoli uchun barcha xarajatlarga tayyor ota-ona shakllanib borayotgan bolalar sporti ko‘rinishidagi tadbirkorlik faoliyatiga katta hissa qo‘shmoqda. WinterGreen Research marketing kompaniyasining olib borgan izlanishlaridan ma'lum bo‘ldiki, bolalar sporti va uning atrofidagi kichik tarmoqlar, shaxsiy murabbiydan tortib, maxsus smartfon ilovasi hamda o‘yinlarni jonli translyatsiya qilishlar umumiy hisobda 15,3 milliard AQSh dollari miqdoridagi katta bozorni yaratdi.

Shiddat bilan rivojlanib borayotgan bolalar sporti biznesi mahalliy iqtisodiyotga ijobiy ta'sir ko‘rsatadi. Ayrim yosh sportchilarning raqobatga kirishib, kurash maydoniga erta chiqishi yakunda chinakam yengilmas sportchi tarbiyalanishiga zamin yaratadi. Shuningdek, bolalar mamlakatning turli hududlarida bo‘lib, chet el safarlariga ham otlanadi. Bu bilan ular ulkan tajribaga ega bo‘lib borishi tayin.

Shunga qaramay, kishini tashvishga soluvchi omillarga ham e'tibor qaratish lozim. Birinchidan, bolaning sport bilan shug‘ullanishi ko‘p mablag‘ talab qila boshladi, bu esa o‘rtamiyona hayot kechirayotgan oila farzandining jismoniy tarbiya mashg‘uloti bilan cheklanib qolishga majbur qilmoqda. Ikkinchidan, iqtidorining vaqtli kashf etilmagani bola psixologiyasiga salbiy ta'sir ko‘rsata boshlaydi. Qolaversa, sportda muvaffaqiyatlarga erisha boshlagan yosh o‘quvchi maktabdagi ta'limga, umuman ilm olishga nisbatan o‘zida rag‘bat sezmaydi.

AQShda o‘tkazilgan so‘rovnomaga ko‘ra, maktab paytidan sport bilan shug‘ullanib kelgan o‘quvchilarning faqat 2 foizigina kelgusida Talabalar sport milliy assotsiatsiyasida (NCAA) faoliyatini davom ettiradi. Ko‘p ota-onalar uzoq kelajakni o‘ylagan holda, farzandining kelgusida ta'lim olishini ta'minlash maqsadida pul jamg‘arib borgani ma'qul, deb biladi.