Keniyada prezidentlik saylovlari takroran o‘tkaziladigan sana ma'lum qilindi

Keniya mustaqil saylov komissiyasi avvalgi prezidentlik saylovlari natijalari bekor qilingandan keyin, uni takroran 17 oktabrda o‘tkazishni belgiladi. 

“8 avgustdagi saylovlar natijasini bekor qilgan Oliy sud qaroriga ko‘ra, yangi prezidentlik saylovlari 17 oktabrda o‘tadi”, deb xabar qilgan saylov komissiyasi tvitterda.

Birinchi saylovlar natijalariga ko‘ra ikkinchi muddatga saylangan amaldagi prezident Uxuru Keniata g‘olib deb e'lon qilingandi. Biroq muxolifat nomzodi Raila Odinga saylov natijalariga ta'sir qilish maqsadida saylov komissiyasi inter-tizimiga buzib kirilganini ta'kidlagan.

Shundan keyin Oliy sud saylovlar o‘tkazilishida qoidabuzarliklarga yo‘l qo‘yilganiga qaror qilib, 60 kun ichida yangi prezidentlik saylovlari o‘tkazish kerakligi haqida hukm chiqargan.