DW xabariga koʻra, Mombasa shahri sudi mazkur qarorni 19-oktabr kuni chiqargan. Ish Makkenzi asos solgan «Xushxabar xalqaro cherkovi» diniy guruhi aʼzolarining ommaviy oʻlimi bilan bogʻliq.
Makkenzi 2003-yilda tuzgan tashkiloti izdoshlarini «Iso bilan uchrashish» uchun ochlikdan oʻlishga undagan. Hind okeani sohilidagi Malindi kurorti yaqinida, Shakaxola oʻrmonida joylashgan unga tegishli katta yer maydoni sekta markaziga aylangan.
Xabarda qayd etilishicha, Makkenzi izdoshlari uchun oʻta ogʻir ochlik tartibini joriy qilgan. U belgilagan navbatga koʻra, avval bolalar, keyin oʻsmirlar, ayollar va oxirida erkaklar oʻlishi kerak boʻlgan. Ayrim hollarda bolalar ota-onalarining koʻz oʻngida ovqatdan mahrum qilingan.
Voiz huquq himoyachilarining shikoyatlaridan soʻng 2023-yil aprelida hibsga olingan. Tergov davomida sekta aʼzolarining bir qismini qutqarishga muvaffaq boʻlingan, biroq oʻrmondan koʻplab ommaviy qabrlar topilgan.
Sud-tibbiy tekshiruvlar bolalarning aksariyati ochlikdan vafot etganini koʻrsatgan. Shu bilan birga, boʻgʻilish va bosh miya jarohatlari oqibatida oʻlim holatlari ham aniqlangan.
Keniya ommaviy axborot vositalari bu voqeani «Shakaxola oʻrmonidagi qatliom» deb atagan. Sekta qurbonlarining umumiy soni 400 kishidan oshishi mumkin. Sudning hozirgi qarori esa 190 bola va bir katta yoshli shaxsning oʻlimiga oid ish boʻyicha chiqarilgan.
