Andijondagi kollejda Favqulodda vaziyatlar davlat tizimi uchun mutaxassislar tayyorlanadi

Qabul qilingan qarorga asosan, Favqulodda vaziyatlar davlat tizimi uchun mutaxassislar tayyorlash respublikadagi 4 ta viloyat muassasalari qatori Andijon qurilish va transport kasb-hunar kollejiga ham yuklatilgan.

Ta'lim dargohida qisqa vaqt ichida 160 o‘rinli o‘quvchilar turar joyi, yuvinish xonalari, 120 o‘ringa mo‘ljallangan oshxona, sport zali, ushbu yo‘nalish bo‘yicha jihozlangan 3 ta maxsus o‘quv xonalari tayyor holatga keltirildi.

Kuni kecha mazkur yo‘nalish bo‘yicha o‘qishga qabul qilingan 26 nafar o‘quvchi, ularning ota-onalari hamda o‘qituvchilari bilan O‘zbekiston Respublikasi Favqulodda vaziyatlar vazirining birinchi o‘rinbosari K.Aripov, viloyat favqulodda vaziyatlar boshqarmasi boshlig‘i F.Abdiqodirovlar ishtirokida kasbga yo‘naltirish borasida uchrashuv hamda ushbu yo‘nalish uchun ajratilgan binoning tantanali ochilish marosimi bo‘lib o‘tdi. 

- Soha mutasaddilari bilan uchrashuv jarayonida Prezident qarorining mazmun-mohiyati, favqulodda vaziyatlar davlat tizimidagi mutaxassislik kasblarga yo‘naltirish, favqulodda vaziyatlarda harakat qilish, aholi va hududlarni favqulodda vaziyatlardan muhofaza qilish hamda shu sohadagi vazifalarni bajarish bo‘yicha amaliy ko‘nikmalar o‘quvchilarga singdirildi, - deydi viloyat o‘rta maxsus, kasb-hunar ta'limi boshqarmasi boshlig‘i Furqatbek Buzrukov. 

Tadbir davomida 10 nafardan ziyod o‘quvchining mavzuga oid fikr-mulohazalari tinglandi hamda savollarga javob berildi. 

KUN.UZ muxbiri Elmurod Ermatov, Andijon.