Ispaniyaning Kataloniya muxtor hamjamiyatida yana mustaqillik bo‘yicha referendum o‘tkaziladigan bo‘ldi. 6 sentabrda muxtoriyat parlamenti bu masala bo‘yicha umumxalq referendumi o‘tkazish qonunini qabul qildi. Uni parlamentning 135 a'zosidan 72 nafari qo‘llab-quvvatladi.
Kataloniya hukumati raisi Karles Puchdemon muxtoriyatning Ispaniya tarkibidan chiqishi bo‘yicha referendum o‘tkazish ko‘zda tutilgan ushbu qonunni imzoladi.
Referendumni 1 oktabrda o‘tkazish belgilandi. Bu haqda tvitterda katalon hukumati matbuot xizmati boshlig‘i Jaume Klote ma'lum qildi. Ushbu qonun katalon parlamenti muxolifati, Ispaniyaning yetakchi partiyalari va mamlakat hukumati tomondan noqonuniy deb hisoblanmoqda.
Ispaniya bosh vaziri Mariano Raxoy mamlakat konstitutsiyaviy sudiga ushbu qaror bo‘yicha da'vo arizasi bermoqchi.
Qonunga ko‘ra, agar Kataloniyaning ko‘pchilik aholisi mustaqillik uchun ovoz bersa, muxtoriyat zudlik bilan qirollik tarkibidan chiqadi. Agar mustaqillik tarafdorlari kamchilikni tashkil qilsa, muxtoriyatda yangi saylovlar bo‘lib o‘tadi.
Avval ham Kataloniyada mustaqillik bo‘yicha referendum o‘tkazilgan. Bu referendum Madrid tomondan noqonuniy deb topilgan.
