Kanadaning CBC News teleradiokompaniyasi xabariga koʻra, provinsiya ajralib chiqishi tarafdorlari referendumda magʻlub boʻladi. Ovozga Albertaning Kanadadan ajralib chiqishi emas, balki bu borada yangi referendum oʻtkazish kerakmi yoki yoʻqmi degan masala qoʻyilgan edi.
Elections Alberta veb-sayti maʼlumotlariga koʻra, saylovchilarning aksariyati - taxminan 76 foizi «Alberta Kanada provinsiyasi boʻlib qolishi kerak» degan bandni tanlagan. Kanada tarkibidan chiqish jarayonini boshlash uchun provinsiya aholisining taxminan 24 foizi ovoz bergan.
«19-oktabr kuni Alberta aholisi aniq tanlov qildi. Ular birlikni, kelajakni birgalikda qurishni va bir-biriga gʻamxoʻrlik qilishni tanladi. Eng avvalo, ular Kanadani tanladi», - deb dastlabki natijalarga izoh berdi mamlakat bosh vaziri Mark Karni.
Referendumning toʻliq natijalari saylov uchastkalari yopilganidan ikki sutka oʻtgach, yakuniy rasmiy natijalar esa 29-oktabrda maʼlum boʻladi.
Alberta bosh vaziri Daniel Smit ajralib chiqish tarafdorlari 300 mingga yaqin imzo toʻplagan petitsiyaga javoban mustaqillik masalasini shu yilning may oyida saylov byulleteniga kiritgan edi.
Alberta - Kanadaning asosiy neft va gaz qazib oluvchi provinsiyasi: mamlakatda qazib olinadigan neftning qariyb 80 foizi uning hissasiga toʻgʻri keladi. Shu bilan birga, xom neft Kanada eksportining asosiy mahsuloti hisoblanadi: oʻtgan yili u 142 milliard Kanada dollari (100 milliard AQSH dollari) miqdorida daromad keltirgan.
Kanadaning gʻarbida joylashgan Alberta okeanga chiqish yoʻliga ega emas va u yerdagi neftning katta qismi AQSH neftni qayta ishlash zavodlariga eksport qilinadi.
Mustaqillik tarafdorlari provinsiya markaziy hukumatga juda koʻp pul berayotgani va evaziga juda kam narsa olayotganidan shikoyat qilmoqda. Ular Alberta neft zaxiralari hajmi boʻyicha Venesuela, Saudiya Arabistoni va Erondan keyin dunyoda toʻrtinchi oʻrinda turishini eslatib oʻtmoqda.
