Milliy statistika qoʻmitasi Oʻzbekiston mustaqilligining 35 yilligi munosabati bilan mamlakatda oʻtgan davr mobaynida qayd etilgan asosiy ijtimoiy-iqtisodiy oʻzgarishlarni raqamlarda taqdim etdi.
Maʼlumotlarga koʻra, 1991-yilda Oʻzbekistonning doimiy aholisi 20,6 million kishini tashkil etgan boʻlsa, 2026-yil 1-yanvar holatiga bu koʻrsatkich 38,2 million kishiga yetgan. Shu tariqa, 35 yilda mamlakat aholisi 17,6 million kishiga yoki qariyb 85 foizga koʻpaygan.
Iqtisodiyot hajmida ham sezilarli oʻsish qayd etilgan. 1994-yilda Oʻzbekiston yalpi ichki mahsuloti 6,4 milliard AQSH dollarini tashkil etgan boʻlsa, 2025-yilda 147,1 milliard dollarga yetgan.
Tashqi savdo aylanmasi 1991-yildagi 3,3 milliard dollardan 2025-yilda 82,8 milliard dollargacha oshgan. Eksport hajmi esa shu davrda 1,8 milliard dollardan 34,2 milliard dollarga yetgan.
Investitsiyalar hajmi 1991-yilda 1,1 milliard dollarni tashkil etgan boʻlsa, 2025-yilda 48,5 milliard dollarga yetgan. Qurilish ishlari hajmi ham 1995-yildagi 611 million dollardan 2025-yilda 25 milliard dollargacha koʻpaygan.
Sanoat mahsulotlari ishlab chiqarish hajmi 1991-yilda 3 milliard dollar boʻlgan. 2025-yilga kelib ushbu koʻrsatkich 87,5 milliard dollarni tashkil etgan.
Taʼlim sohasida ham muassasalar soni ortgan. Xususan, 1991-1992 oʻquv yilida mamlakatda 52 ta oliy taʼlim tashkiloti faoliyat yuritgan boʻlsa, 2025-2026 oʻquv yilida ularning soni 215 taga yetgan.
Umumiy oʻrta taʼlim tashkilotlari soni esa 8 557 tadan 11 118 taga koʻpaygan.
Sogʻliqni saqlash sohasida 1991-yilda 1 388 ta shifoxona mavjud boʻlgan boʻlsa, 2024-yilda ularning soni 1 972 tani tashkil etgan. Aholining oʻrtacha umr koʻrish davomiyligi 1991-yildagi 66,4 yoshdan 2025-yilda 75,4 yoshga yetgan.
Aholining transport vositalari va aloqa qurilmalari bilan taʼminlanganlik koʻrsatkichlari ham oʻsgan. 2010-yilda har 100 ta uy xoʻjaligiga 21 ta avtomobil toʻgʻri kelgan boʻlsa, 2025-yilda bu koʻrsatkich 61 taga yetgan. Har 100 ta uy xoʻjaligiga toʻgʻri keladigan mobil telefonlar soni esa shu davrda 145 tadan 359 taga koʻpaygan.
Oʻzbekistonga turistlar tashrifi 2012-yilda 1,9 million nafarni tashkil etgan boʻlsa, 2025-yilda 11,7 million nafarga yetgan.
Shuningdek, faoliyat koʻrsatayotgan korxona va tashkilotlar soni 2010-yilda 201 mingta boʻlgan. 2026-yil 1-yanvar holatiga ularning soni 474,9 mingtani tashkil etgan.
