Cherkovga hujumdan omon qolganlar hikoyalari. Texaslik qotil 2012 yilda jinnixonadan qochgan

1 noyabr kuni Texasdagi baptistlar cherkovida 26 kishini otib tashlagan va yana 20dan ortiq kishini yaralagan Devin Kelli 2012 yilda ruhiy kasalliklar shifoxonasidan qochgandi.

5 yil muqaddam Kellini hibsga olgan politsiyachining ma'lumot berishicha, u o‘ziga va atrofdagilarga xavf tug‘dirgan.

Bir necha marta turmush o‘rtog‘i va farzandiga qilgan zo‘ravonliklaridan keyin Kelli harbiy tribunal hukmi bilan da'volanish uchun yo‘llangandi. U Nyu-Meksiko shtatidagi «Hollomen» aviabazasiga xizmatga kirib, 2 yildan keyin shunday jazo olgandi.

Politsiya hisobotida keltirilishicha, u o‘z boshliqlariga ham tahdid qilgan.

Rasmiylarning so‘zlariga ko‘ra, sudlangani tufayli Kelli o‘qotar qurolga ega bo‘lishi mumkin emasdi.

El-Paso shahri politsiyasi uni 2012 yilning iyunida avtobus bekatida qo‘lga olgandi.

Xabar qilinishicha, u El-Pasodan 160 km masofadagi Santa-Tereza klinikasiga joylashtirilgandi. U klinikadan yo‘qolib qolgach, politsiyaga xabar berilgan.

Hisobotda aytilishicha, u aviabazadagi xizmat vaqtiga o‘ziga o‘q uzishga harakat qilganida to‘xtatilgan va qo‘lga olingandi.

U tribunalda o‘z rafiqasi va asrab olingan o‘g‘liga zo‘ravonlik qilishda aybdor deb topilib, 12 oylik qamoqqa hukm qilingan.

FQB xodimlari Kellining telefonini blokdan yechib, uning ommaviy qotillik qilishga sabablarini o‘rganishga harakat qilishgan.

Houston Chronicle nashrida yozilishicha, qotil Sazerlend-Springsdagi cherkovga hujum qilishidan 5 kun oldin bu yerga farzandi bilan kelib, kuzgi festivalda ishtirok etgan.

Kellining sobiq qaynonasining dugonasi hikoya qilishicha, o‘sha kuni uning oilasi bilan ekanidan hamma xursand bo‘lgan.

Cherkovning ijtimoiy tarmoqdagi sahifasiga joylangan marosimga oid fotosuratlarda «Hellouin» liboslarini kiygan holda o‘ynab yurgan bolalarni ko‘rish mumkin. Ularning ba'zilari 5 kundan keyingi qirg‘in vaqtida halok bo‘lishdi.

Hujumdan omon qolganlarning hikoya qilishicha, Kelli cherkov ichida qatorlar oralab yurgan va yig‘layotgan bolalarga o‘q uzgan.

Guvohlardan biri Rozann Solis shunday hikoya qiladi: «450ta o‘qli vintovka bilan qurollangan erkak cherkovga kirib keldi. «Hammaga o‘lim!» deya baqirdi u. Barcha pichirlab gapira boshladi: «Jim, jim. Axir bu u-ku». Hamma stullar ostiga kirdi, hamma qayergadir yashirinishga harakat qilardi. Ammo u to‘xtamasdan o‘q uzardi».

Guvohlarning KSAT telekanaliga intervyuda eslashicha, u jasadlar oralab yurarkan, tirik qolganlarni izlagan.

Rozann Solisning turmush o‘rtog‘i Xoakin Ramires pastorning 14 yoshli qizi Annabel Pomeroy baqirib yig‘layotganini ko‘rgan va unga imo qilib, jim bo‘lishni so‘ragan. Ammo qotil qizchani ko‘rgan zahoti o‘ldirgan. U bolalarni yig‘i ovozi tufayli topib, o‘ldiravergan.

Ramires va rafiqasi o‘zini o‘lganga solgani uchun omon qolishgan. Ammo ular kichik jarohatlar olishgan.

Shuningdek, 73 yoshli Farida Braun va uning o‘g‘li ham xunrezlikdan omon qolgan. O‘g‘il KENS-TV telekanaliga intervyu berdi: «Bu odam yurgan yo‘lida odamlarni o‘qqa tutdi. Shu vaqtda u bir ayolning ro‘parasiga kelib to‘xtadi. U ayol onamga jovdiragancha qaradi. Onam esa unga derdi: «Hammasi yaxshi bo‘ladi. Sen jannatga tushasan. Sen jannatga tushasan». Shundan so‘ng u o‘lim oni yaqinligini sezdi va ibodat qilishga tutindi».

Shu vaqtda cherkovga qo‘shni binoda yashaydigan Stiven Uilford kirib kelgan va u Kelliga qarata o‘q uza boshlagan. Kelli jarohat olgan va qochishga tushgan.

Uilford va yana bir kishi uni pikapda ta'qib etgan. Yo‘lda ta'qib etilayotgan avtomobil boshqaruvni yo‘qotgan va to‘siqqa borib urilgan.

Kellini mashina ichidan jonsiz holda topishdi. Politsiya ma'lumotiga ko‘ra, u o‘z boshiga o‘q uzgan.