OTB vitse-prezidenti O‘zbekistonga keldi, mamlakat 2,9 mlrd. dollarlik investitsiyalarni oladi

10 noyabr kuni Osiyo taraqqiyot banki vitse-prezidenti Ventsay Jang O‘zbekiston Respublikasi bosh vaziri Abdulla Aripov bilan uchrashdi. Osiyo taraqqiyot banki veb-saytiga ko‘ra, Jang OTB hukumatning rivojlantirish dasturini qo‘llab-quvvatlashini ma'lum qildi va mamlakatning iqtisodiy istiqbollariga ishonch bildirdi.

O‘zbekistonga tashrifi chog‘ida Jang bosh vazir o‘rinbosari Jamshid Qo‘chqorov, moliya vaziri va O‘zbekiston Respublikasidan OTB Boshqaruvchisi Botir Xo‘jayev, shuningdek, boshqa yuqori lavozimli mulozimlar bilan uchrashdi hamda OTB amaliyotlari va O‘zbekiston bilan hamkorlikning kelajakdagi yo‘nalishlarini muhokama qildi.

«Men hukumatning iqtisodiyotni liberallashtirish va infratuzilmani rivojlantirish borasidagi qat'iyatidan juda mamnunman», - dedi Jang. «OTB O‘zbekiston tarixidagi ushbu muhim bosqichda O‘zbekiston xalqining farovonligini ta'minlash uchun hukumat va boshqa manfaatdor tomonlar bilan hamkorlikni kengaytirishga umid qiladi».

Jangning ta'kidlashicha, OTB yaqinda O‘zbekiston uchun 2018-2020 yillarga mamlakatda amaliyotlar bo‘yicha biznes-rejani tasdiqladi. U hukumatning strategiyasini to‘liq qo‘llab-quvvatlaydi va O‘zbekistonni rivojlantirishning yangilangan ustuvor jihatlarini aks ettiradi. OTB kreditlash sohasi, energetika, transport va shahar rivojlanishi sektorlarida infratuzilma taraqqiyotini kuchaytirish uchun salohiyatni rivojlantirish hamda bilimlarni kengaytirish, davlat xizmatlari sifatini yaxshilash, shuningdek, kichik va o‘rta korxonalar hamda agrobiznesni moliyalashtirishga kengroq imkoniyat yaratish bo‘yicha yordam berishga tayyor. Biznes-reja 2018-2020 yillarga mo‘ljallangan, 2,9 mlrd. AQSh dollarilik investitsiya loyihalari portfelini o‘z ichiga oladi. OTB davlat sektoriga ko‘mak ko‘rsatishdan tashqari, xususiy sektor va davlat-xususiy sherikligiga to‘g‘ridan-to‘g‘ri sarmoyalar imkoniyatini ham ko‘rib chiqadi.

Tashrif chog‘ida Jang ishtirokida «Pop-Namangan-Andijon» temir yo‘lini elektrlashtirish loyihasi bo‘yicha 80 mln. AQSh dollarilik zayom kelishuvi imzolandi. Loyiha doirasida Farg‘ona vodiysining asosiy shaharlarini poytaxt bilan bog‘laydigan elektrlashtirilmagan temir yo‘llarning 145,1 kilometri elektrlashtiriladi. Bu yuk va yo‘lovchi poyezdlarning to‘g‘ridan-to‘g‘ri hamda samarali harakatlanishiga, shuningdek, Farg‘ona vodiysining iqtisodiy va ijtimoiy rivojlanishiga ko‘maklashadi.

Jang OTB qo‘llab-quvvatlovi bilan amalga oshirilayotgan loyihalarni borib ko‘rdi, hamda Urganch shahrida mahalliy ma'muriyat vakillari va loyihalar benefitsiarlari bilan uchrashdi. Ular orasida OTB va O‘zbekiston hukumati tomonidan tijorat banklari orqali kichik biznesni rivojlantirish bo‘yicha loyihalar doirasida moliyalashtirilayotgan kichik korxonalar ham bo‘lgan. Shuningdek, u Osiyo taraqqiyot bankining moliyaviy yordami bilan yaxshilangan suv ta'minoti va sanitariya obektlariga tashrif buyurdi.

O‘zbekiston Osiyo taraqqiyot bankiga1995 yilda kirganidan beri umumiy miqdori 6,3 milliard AQSh dollariga teng 65 ta kredit oldi. Jumladan, 225 million dollarlik xususiy sektorni rivojlantirish uchun ikkita kredit, 6 million dollar - aksiyadorlik kapitaliga investitsiyalar ko‘rinishida, 200 million dollar - kafolatlar ko‘rinishida va 65,6 million dollar - texnik ko‘mak uchun grantlar ko‘rinishida.