Ramzan Qodirov Suriya va Iroqdagi biror rossiyalikni kulfatda qoldirmaslikka va'da berdi

Checheniston rahbari Ramzan Qodirov hukumat Suriya va Iroqdagi qaynoq nuqtalarda qolayotgan ayollar va bolalarni uylariga qaytarish bo‘yicha katta ishni amalga oshirayotganini va bu ish katta xavf bilan bog‘liqligini aytib o‘tdi. U birorta ham rossiyalikni bu mushkul vaziyatda qoldirmaslikka va'da berdi.

13 noyabrda Grozniyga Suriyada ozod qilingan 41 ayol va bolalar yetkazildi. Ular orasida O‘zbekistonning 2 nafar fuqarosi  ham bo‘lgan.

“Avvalroq biz Suriya va Iroqdan 48 kishini olib chiqishga muvaffaq bo‘lgandik. Bu raqamlar ortida hayot uchun xavfli bo‘lgan ulkan ish bor. Biz umumiy holda 89 kishini qaytardik. Bu ish nafaqat yurtdoshlarimiz, balki MDH davlatlari fuqarolarini ham qamrab olgan. Federal markaz bilan hamkorlikda ayollar va bolalarning joylashgan o‘rni, ularning shaxsini aniqlash bo‘yicha kompleks tadbirlar amalga oshirilmoqda”, deb yozgan Qodirov Instagram’da.

Qodirov, shuningdek, o‘zining Yaqin Sharq va Shimoliy Afrika davlatlaridagi vakili Ziyod Sabsabiyga, Suriyadagi rossiyalik harbiylarga minnatdorlik bildirdi. Qodirovning aytishicha, ular juda murakkab tashkiliy muammolarni hal qilishda maksimal ko‘mak ko‘rsatmoqdalar.

“Biz ushbu vazifa to‘liq bajarilmagunga qadar ishni to‘xtatmaymiz. Rossiyaning birorta fuqarosini kulfatda qoldirmaymiz!”, deb qo‘shimcha qilgan Checheniston rahbari.