Obektdan ifloslangan mashina chiqarilgani uchun quruvchi jarimaga tortiladi

Toshkent shahar hokimi 11.10.2017 yildagi 158-f-son farmoyishga imzo chekdi, u atrof-muhitni himoya qilish va shahar ko‘chalari ifloslanishining oldini olishga qaratilgan. Bu haqda Norma.uz xabar bermoqda.

Hujjatga ko‘ra, Toshkent shahridagi barcha qurilish maydonlariga katta yuk avtomobillari g‘ildiraklarini shahar magistrallariga chiqishdan oldin yuvish majburiyati yuklandi. Mazkur talabni bajarish uchun qurilish tashkilotlari g‘ildiraklarni yuvishga mo‘ljallangan maxsus asbob-uskunalarni sotib olishlariga to‘g‘ri keladi.

Poytaxt hokimligida o‘tkazilgan brifing chog‘ida Davlat ekologiya qo‘mitasi huzuridagi maxsus komissiya vakili A.Mustafin faqat estetik jihatlarni inobatga olib emas, balki mintaqaning iqlimiy o‘ziga xosliklaridan kelib chiqib shunday talab qo‘yilganligini ta'kidladi.

– Tuproqning tabiiy xususiyatlari sababli O‘zbekistonga yuqori darajadagi changlik xos. Katta yuk ortiladigan qurilish mashinalari o‘z g‘ildiraklari bilan loylarni umumiy foydalanishdagi avtotrassalarga olib chiqqanida vaziyat yanada murakkablashadi, – dedi u.

Hokim o‘rinbosari Farida Abdurahimova ta'kidlaganidek, bugungi kunda Toshkentda hujjatning ijrosi bo‘yicha choralar ko‘rilgan. Namuna tariqasida Sergeli tumanidagi yirik qurilish obekti keltirilgan, u yerda arzon turar joylar kompleksi qurilmoqda. Ushbu obektda tegishli asbob-uskunalar sotib olingan va foydalanilmoqda.

Qaror bilan yangi talablarni e'tiborsiz qoldirgan quruvchilar uchun jazo ko‘zda tutilgan. Ularga nisbatan jarimalar yoki talab bajarilguniga qadar barcha qurilish ishlarini to‘xtatib turish qo‘llaniladi.

Ma'lumot uchun: qurilish-montaj ishlarini bajarishda talablarni buzish mansabdor shaxslarga EKIHning 3 dan 5 baravarigacha jarima solishni ko‘zda tutadi (MJtK 99-modda 1-qism).

Hujjatda, shuningdek, noto‘g‘ri transportirovka qilinganida ko‘chalarni ifloslashi mumkin bo‘lgan qurilish materiallari va qurilish chiqindilarini tashish qoidalariga ham to‘xtalib o‘tilgan. Bunday yuklarni yoki maxsus texnikada (yopiq kuzovli) yoxud oddiy yuk mashinalarida oldindan yuklarni namlab va ustini tent bilan yopib tashish darkor.

Poytaxt hokimligi vakili ta'kidlaganidek, farmoyish bajarilishini nazorat qilish maxsus guruh zimmasiga yuklatilgan bo‘lib,  u har 10 kunda barcha yirik qurilish obektlarini monitoring qiladi.