Buyuk Britaniyaning Skytrax konsalting kompaniyasi jahondagi eng yaxshi biznes-klass aviakompaniyalari reytingini e'lon qildi. Qatarning «Qatar Airways» aviakompaniyasi birinchi o‘rinda qayd etildi, deb yozadi Korrespondent.net.
Shunisi ma'lumki, reytingni tuzish asnosida kompaniya mutaxassislari jahonning yuzdan ziyod davlatlarida yashovchi 19,2 milliondan ortiq aviayo‘lovchilar o‘rtasida so‘rovnoma o‘tkazishgan.
Umumiy hisobda o‘rindiqlar komforti darajasi, samolyotga o‘tqazish jarayoni va boshqa shu kabi 41ta mezon bo‘yicha baholangan 280ta aviakompaniya ko‘rib chiqilgan.
Ikkinchi o‘rinda Yaponiyaning ANA — «All Nippon Airways» aviakompaniyasi qad etilgan bo‘lsa, uchlikni Singapurning «Singapore Airlines» kompaniyasi yakunlab bergan.
Dastlabki o‘nlikka shuningdek, «Etihad Airways» (BAA), «Lufthansa» (Germaniya), «Turkish Airlines» (Turkiya), «Garuda Indonesia» (Indoneziya), «Cathay Pacific» (Hongkong), «Emirates» (BAA) va «EVA Air» (Tayvan) ham kirgan.
