2026-yilda dunyoning bozor kapitalizatsiyasi eng yuqori bo‘lgan aviakompaniyalari ma’lum bo‘ldi. Reyting CompaniesMarketCapʼning iyul oyidagi ma’lumotlari asosida tuzilgan bo‘lib, unga faqat aksiyalari birjada sotiladigan ommaviy kompaniyalar kiritilgan. Xususiy va to‘liq davlatga qarashli aviakompaniyalar hisobga olinmagan.

Reytingda birinchi o‘rinni AQShning Delta Air Lines aviakompaniyasi egalladi. Iyul oyida uning bozor kapitalizatsiyasi 58,5 mlrd dollarni tashkil etgan. Bu ikkinchi o‘rindagi eng yaqin raqobatchisidan 18 mlrd dollardan ko‘proqqa yuqori.

Delta 1925-yilda tashkil etilgan bo‘lib, bosh qarorgohi Atlanta shahrida joylashgan. Kompaniya kuniga 5,4 mingdan ortiq reysni amalga oshiradi va SkyTeam xalqaro avialyansining asoschilaridan biri hisoblanadi.

Ikkinchi o‘rinni yana bir AQSh aviakompaniyasi - United Airlines egallagan. Uning bozor kapitalizatsiyasi 40,1 mlrd dollarga baholangan.

AQShning yirik aviakompaniyalari o‘rtasida bozor qiymati bo‘yicha sezilarli farq mavjud. Masalan, American Airlines kapitalizatsiyasi 10,1 mlrd dollarni tashkil etgan - bu Delta qiymatining beshdan bir qismidan ham kam.

Manbada bu farq American Airlinesʼning raqobatchilariga nisbatan pastroq rentabelligi va yuqoriroq qarz yuki bilan izohlangan.

Shu bilan birga, asosan Shimoliy Amerika hududida parvozlarni amalga oshiradigan Southwest Airlines 22,3 mlrd dollarlik bozor qiymati bilan American Airlinesʼdan ikki barobardan ham qimmat baholangan.

Ryanair Yevropada yetakchi

Reytingning uchinchi pog‘onasini Irlandiyaning Ryanair loukosteri egalladi. Kompaniyaning bozor kapitalizatsiyasi 31,1 mlrd dollarni tashkil etgan. Shu tariqa, Ryanair AQShdan tashqaridagi eng qimmat aviakompaniya bo‘lgan.

Dublinda joylashgan Ryanair yo‘lovchilar soni va amalga oshiriladigan reyslar miqdori bo‘yicha Yevropaning yirik tashuvchilaridan hisoblanadi. Kompaniya biznes modeli nisbatan arzon bazaviy chiptalarga asoslangan, bagaj tashish, o‘rin tanlash va boshqa qo‘shimcha xizmatlar uchun esa alohida haq olinadi.

Ryanair bozor kapitalizatsiyasi bo‘yicha IAG va Lufthansa kabi yirik Yevropa aviatsiya guruhlarini ham ortda qoldirgan.