Messi yana penaltidan gol urolmadi, lekin «Barselona» yirik g‘alabaga erishdi

Ispaniya chempionatining 16-turida «Barselona» o‘z maydonida «Deportivo»ni qabul qildi. «Kamp Nou»da o‘tgan uchrashuvda mezbonlar jamoasining 4:0 hisobidagi yirik g‘alabasi qayd etildi.

G‘olib jamoa safida gollarni dubllar qayd qilgan Luis Suares va Paulino o‘z hisoblariga yozib qo‘yishdi.

Lionel Messi 70-daqiqada penaltini aniq amalga oshira olmadi.

Argentinalik futbolchi uchun bu 2017 yil davomida uchinchi marta penaltidan adashish bo‘ldi. Oxirgi marta «Barselona» futbolchisi bir kalendar yili ichida qatorasiga uchta penalti zarbasini golga aylantira olmasligi 12 yil muqaddam kuzatilgandi. 2005 yilda kamerunlik futbolchi Samuel Eto'o ham jamoaning Ispaniya chempionatidagi o‘yinlarida 11 metrli nuqtadan 3 marta xato qilgandi.

Messi joriy mavsumda Ispaniya chempionatining 16 o‘yinida 14 gol urgan (bittasi penaltidan) va 7ta golga assistentlik qilgan.

Katalonlar klubi bu g‘alaba evaziga joriy mavsumdagi mag‘lubiyatsiz seriyasini 16 o‘yinga yetkazib qo‘ydi.

«Barsa» 42 ochko bilan musobaqa jadvalida peshqadamlikni davom ettirmoqda. Klub eng yaqin ta'qibchisi «Atletiko»dan 6 ochkoga o‘zib ketgan. «Barselona» bilan keyingi turda (23 dekabr) to‘qnash keladigan «Real» 31 ochko bilan 4-o‘rinni egallab turibdi, «Deportivo» esa 15 ochko bilan 17-o‘rinni band etgan.

Ispaniya Primerasi. 16-tur
Barselona – Deportivo - 4:0
Gollar: 1:0 – 29 Suares, 2:0 – 41 Paulino, 3:0 – 47 Suares, 4:0 – 75 Paulino.
Barselona – ter Stegen, Serdji Roberto, Pike, Vermalen, Alba (Din, 81), Inesta (Andre Gomesh, 56), Rakitich, Paulino, Pako Alkaser (Aleish Vidal, 23), Messi, Suares.
Deportivo – Martines, Xuanfran, Sher, Sidney, Navarro, Gilerme (Valverde, 63), Borxes, Xil (Borxa Vale, 84), Cholak (Bakkali, 63), Adrian, Peres.
Ogohlantirishlar: Sher (32).
Aniq amalga oshirilmagan penalti: Lionel Messi (70)