Toshkentda Qozog‘istonda qidiruvda bo‘lgan jinoyatchi ushlandi

2017 yilning 19 dekabr kuni Toshkent shahar Ichki ishlar bosh boshqarmasiga chet el davlatida qidiruvda bo‘lgan shaxs Toshkent shahri hududida yurganligi haqida tezkor ma'lumot kelib tushdi, deb xabar bermoqda poytaxt IIBB.

Ushbu ma'lumot asosida Toshkent shahar IIBB xodimlari tomonidan qidiruvdagi jinoyatchini ushlashga qaratilgan tezkor reja ishlab chiqilgan. Shundan so‘ng, shu kuni soat 9:00larda Yakkasaroy tumani, Farhod ko‘chasida o‘tkazilgan tadbir jarayonida o‘zini Qozog‘iston Respublikasi fuqarosi Baytasov Aydinu Tanirberganovich deb tanishtirgan shaxs aniqlanib ushlangan. Biroq, mazkur shaxs bilan o‘tkazilgan tekshiruv davomida u haqiqatda 20.09.1984 yilda tug‘ilgan, Qozog‘iston Respublikasi fuqarosi, muqaddam bir necha bor sudlangan, uyushgan jinoiy guruh a'zosi, laqabi “Bebet”, Qozog‘iston Respublikasi tomonidan JKning 296-moddasi 4-qismida (giyohvandlik vositalari, psixotrop moddalarni o‘tkazish maqsadini ko‘zlamay qonunga xilof ravishda tayyorlash, qayta ishlash, olish, saqlash, tashish)da ko‘rsatilgan jinoyatni sodir etganligi uchun qidiruvda bo‘lgan Moldaxmetov Beybetym Kenjatay uli ekanligi, unga nisbatan “qamoqqa olish” tarzidagi ehtiyot chorasi qo‘llanilganligi aniqlangan.

Hozirda B.K.Moldaxmetovni Qozog‘iston Respublikasiga ekstraditsiya qilish masalasi hal etilmoqda.