САВОЛ: Жорий йилда ҳайдовчилик гувоҳномасининг «В» тоифаси бўйича ўқиб, ҳайдовчилик гувоҳномасини олдим. Автомобилим йўқлиги учун ижарага «Дамас» автомобилини олиб, кира қилмоқчи эдим. Аммо бунинг учун ҳайдовчилик стажи бўлиши керак экан. Бу қонунга мувофиқми, шу ҳақда маълумот берсангиз?

Санжар ЗИЁДОВ

ЖАВОБ: «Йўналишсиз таксилар учун ягона таниш белгилари ва уларнинг ишларини ташкил этишга қўйиладиган талаблар тўғрисида»ги Низомнинг 8-бандида «Йўловчилар ташиш учун мўлжалланган йўналишсиз таксиларни бошқаришга ҳайдовчилик гувоҳномасида «В» рухсат белгиси бўлган, 21 ёшга тўлган, тиббий кўрикдан ўтган ва камида уч йиллик ҳайдовчи стажига эга бўлган шахслар қўйилади», деб белгиланган.

Бундан ташқари, ушбу Низомнинг 9-бандига кўра, йўналишсиз таксиларнинг ҳайдовчилари йўналишда ишлаётганда тегишли лицензия карточкасига ҳамда йўлга чиқишдан олдин автотранспорт воситасининг белгиланган тартибда техник кўрикдан ва ҳайдовчиларнинг тиббий кўрикдан ўтказилганлиги тўғрисида белгилар қўйилган йўл варақасига эга бўлиши керак.

Саволга Ўзбекистон автомобиль ва дарё транспорти агентлиги юридик бўлим бошлиғи Шерзод Ўринов жавоб берди.

Эслатма: «Юридик хизмат минбари»да саволларга берилаётган жавоблар тавсиявий характерга эга.